ମାଲକାନଗିରି, ଖଇରପୁଟ ବ୍ଲକ ଅନ୍ତର୍ଗତ କୁଡୁମୁଲୁଗୁମ୍ମା ଗ୍ରାମରେ ଚିତ୍ରକୋଣ୍ଡା ନିର୍ବାଚନ ମଣ୍ଡଳୀର ନବ ନିର୍ବାଚିତ ବିଧାୟକ ମଙ୍ଗୁ ଖିଲଙ୍କ ସ୍ଵାଗତ ସମ୍ବର୍ଦ୍ଧନା ଉପଲକ୍ଷେ ଏକ ବିରାଟ ଶୋଭାଯାତ୍ରା ଆଜି ଅନୁଷ୍ଠିତ ହୋଇଯାଇଛି । ସ୍ଥାନୀୟ ପେଟ୍ରୋଲ ପମ୍ପ ଠାରୁ ଏକ ବିରାଟ ପଟୁଆରରେ ବିଧାୟକ ଶ୍ରୀ ଖିଲ ଶୋଭାଯାତ୍ରାରେ ବାହାରି ଥିଲେ ଓ ଏହି ଅଞ୍ଚଳର ହଜାର ହଜାର ବାସିନ୍ଦା ସେହି ଶୋଭାଯାତ୍ରାରେ ସାମିଲ ହେବା ସହ ନବ ବିଧାୟକଙ୍କୁ ସ୍ଵାଗତ କରି ସମ୍ପୁର୍ଣ୍ଣ ଗ୍ରାମ ପରିକ୍ରମା କରିଥିଲେ ।
ଏହି ଶୋଭାଯାତ୍ରାରେ ମାଦଳର ତାଳେତାଳେ ଯୁବତୀମାନଙ୍କର ଢେମସା ନୃତ୍ୟ ଓ ଯୁବକ ମାନେ ବାଇକ୍ ପଟୁଆରରେ ବାହାରି ବିଭନ୍ନ ଜୟକାର ଧ୍ବନି ଦେଇଥିଲେ ।
ନିଜର ପ୍ରତିକ୍ରିୟାରେ ବିଧାୟକ ଶ୍ରୀ ଖିଲ କହିଛନ୍ତି ଯେ, ଏହି ବିଜୟ ଚିତ୍ରକୋଣ୍ଡା ନିର୍ବାଚନ ମଣ୍ଡଳୀରେ ବସବାସ କରୁଥିବା ସମସ୍ତ ଅଧିବାସୀଙ୍କ ବିଜୟ ଓ ସେ ଆଗାମୀ ଦିନରେ ଆଦିବାସୀ ଅଧ୍ୟୁଷିତ ଅଞ୍ଚଳରେ ଶିକ୍ଷା, ସ୍ବାସ୍ଥ୍ୟ ଓ ଗମନାଗମନକୁ ପ୍ରାଥମିକତା ଦେବା ସହିତ ଚାଷୀ ମାନଙ୍କ ଜମିକୁ ଜଳସେଚନ ଓ ପ୍ରତ୍ୟକ ପରିବାର ଲୋକଙ୍କ ଘରେ ଘରେ ପିଇବା ପାଣି ଯୋଗାଇବା ନିମନ୍ତେ ଚେଷ୍ଟା ଜାରି ରଖିବେ ।
ଆଜିର ଏହି ଶୋଭାଯାତ୍ରାରେ ବିଧାୟକଙ୍କ ସହିତ ଫଗୁରାମ୍ ମୁର୍ମୁ, ଏସାକ୍ ଖୋସଲା, ଦିବାକର ସୁନା, ଅଶୋକ ରାଜ୍, ବନ୍ଧୁ କୁର୍ତ୍ତାଡି ପ୍ରମୁଖ କ°ଗ୍ରେସ ଦଳର ନେତାମାନେ ଉପସ୍ଥିତ ଥିଲେ ।
