କୋରାଇ- ପାଣିକୋଇଲି ଥାନା ଅନ୍ତର୍ଗତ ଜହ୍ନା ପଂଚାୟତର କୁରୁପଦା ଗ୍ରାମରେ ସେମାବାର ଘଟକେଶ୍ୱର ନୋଡାଲ ୟୁପି ସ୍କୁଲର ୪ର୍ଥ ଶ୍ରେଣୀର ଛାତ୍ର ତଥା ସେହି ଗ୍ରାମର ସ୍ୱର୍ଗତ ଶଶିକାନ୍ତ ଦାସ ଓ ସୁଲୋଚନା ଦାସଙ୍କ ସାନପୁଅ ରାକେଶ(୧୦) ଏକ ସାଇକେଲେ ଯୋଗେ ସ୍କୁଲରୁ ଘରକୁ ଫେରୁଥିବା ବେଳେ ତାଙ୍କ ଘରର ଅନତୀ ଦୂରରେ ଏକ ସିମେଂଟ ବୋଝେଇ ଟ୍ରକ ଧକ୍କା ଦେବା ସହ ମୁଣ୍ଡ ଉପରେ ଚଢି ଯାଇଥିଲା । ରାସ୍ତାରେ ଟ୍ରକ ଚଳାଚଳ ବନ୍ଦ ଦାବିରେ ଗ୍ରାମବାସୀମାନେ ଦୁଇ ଘଂଟା ରାସ୍ତା ଅବରୋଧ କରିଥିଲେ । ଘଟଣାସ୍ଥଳେ ପୁଲିସ ଓ ତହସିଲଦାର ପହଂଚି ଉତ୍ୟକ୍ତ ଲୋକଙ୍କୁ ବୁଝାସୁଝା କରିବା ସହ ଟ୍ରକ ଚଳାଚଳ ବନ୍ଦ କରିବାକୁ ପ୍ରତିଶୃତି ଦେବା ଫଳରେ ରାସ୍ତାରୋକ ହଟିଥିଲା । ପିତୃହୀନ ଛାତ୍ରଟିର ଶବ ସତ୍କାର ପାଇଁ ସହାୟତାର ହାତ ବଢାଇଥିଲା ଆମେ ବିପଦରେ ସାଥି ପରିବାର । ଯାଜପୁର ମୁଖ୍ୟ ଚିକିତ୍ସାଳୟରେ ଶବ ସତ୍କାର ପରେ ତାର ମୃତ ଶରୀରକୁ ନେଇ ପୂର୍ଣ୍ଣତୋୟା ବୈତରଣୀ ନଦୀର ବାରୁଣୀ ଘାଟରେ ସତ୍କାର କରାଯାଇଥିଲା । ତାରିଣୀ କୁମାର ପଟ୍ଟନାୟକ, ରାକେଶ ରଂଜନ ପଣ୍ଡା, ଅଜୟ ସାହୁ ପ୍ରମୁଖ ମୃତକ ପରିବାରକୁ ୨ହଜାର ଟଙ୍କାର ଆର୍ଥିକ ସହାୟତା ପ୍ରଦାନ କରାଯାଇଥିଲା ।
