ଧର୍ମଶାଳା, ଯାଜପୁର ଜିଲା ଧର୍ମଶାଳା ନିର୍ବାଚନ ମଣ୍ଡଳୀରେ ସାଧାରଣ ନିର୍ବାଚନ ନିମେନ୍ତ ପ୍ରଚାର ଜୋର ଧରିଛି । ଧର୍ମଶାଳା ବିଜେଡି ବିଧାୟକ ପ୍ରାର୍ଥୀ ପ୍ରଣବ ବଳବନ୍ତରାୟଙ୍କ ପାଇଁ ଅଂଟା ଭିଡିଛି ଧର୍ମଶାଳା ଯୁବ ବିଜେଡି । ଏହି ନିର୍ବାଚନ ମଣ୍ଡଳୀ ୧୧ ନଂ ଜୋନରେ ଯୁବ ବିଜେଡି ପକ୍ଷରୁ ବାଇକ୍ ର୍ୟାଲି ସହ ପଥପ୍ରାନ୍ତ ସଭା ଅନୁଷ୍ଠିତ ହୋଇଛି । ସଭାପତି କ୍ଷିତିଶ ନାୟକଙ୍କ ନେତୃତ୍ଵରେ ଏହି ବାଇକ୍ ରାଲି ଜୋନର ବିଭିନ୍ନ ଛକ ବଜାର ଓ ପଂଚାୟତ ପରିକ୍ରମା କରିଥିଲା । ବାଇକ୍ ରାଲିରେ ବହୁ ସଂଖ୍ୟାରେ ଯୁବ ବିଜେଡି କର୍ମୀ ସାମିଲ ହୋଇ ପ୍ରଣବ ବଳବନ୍ତରାୟଙ୍କ ପାଇଁ ଭୋଟ ଭିକ୍ଷା କରିଥିଲେ । ଏହା ସହିତ ଅନେକ ସ୍ଥାନରେ ପଥପ୍ରାନ୍ତ ସଭା କରି ସରକାରଙ୍କ ଲୋକାଭିମୁଖୀ ଯୋଜନା ସମ୍ପର୍କରେ ଲୋକମାନଙ୍କୁ ସଚେତନ କରାଇବା ସହ ଧର୍ମଶାଳାରେ ହୋଇଥିବା ବିକାଶ କାର୍ଯ୍ୟ ସମ୍ପର୍କରେ ଅବଗତ କରାଇଥିଲେ ।
