ଜବଲପୁର,ଜବଲପୁର ଜିଲ୍ଲାର ଚରଗବାଂ ଥାନା ଅନ୍ତର୍ଗତ ତିନେଟା ଗ୍ରାମରେ ସୋମବାର ପୂର୍ବାହ୍ନ ପ୍ରାୟ ସାଢ଼େ ୧୧ଟା ସମୟରେ ଏକ ଟ୍ରାକ୍ଟର ଭାରସାମ୍ୟ ହରାଇ ଓଲଟି ପଡିବା ଫଳରେ ୫ ଜଣ ଶିଶୁଙ୍କ ମୃତ୍ୟୁ ଘଟିଛି । ଦୁଇ ଜଣ ଆହତ ହୋଇଛନ୍ତି । ମୃତ ଶିଶୁ ମାନଙ୍କ ବୟସ ୧୦ରୁ ୧୮ ବର୍ଷ ମଧ୍ୟରେ ହେବ । ଦୁଇ ଆହତଙ୍କୁ ଉଦ୍ଧାର କରି ମେଡିକାଲ କଲେଜରେ ଭର୍ତି କରିଛି ପୋଲିସ ।
ଅତିରିକ୍ତ ପୋଲିସ ଅଧିକ୍ଷକ ସୂର୍ଯ୍ୟକାନ୍ତ ଶର୍ମା ଏନେଇ ସୂଚନା ଦେଇ କହିଛନ୍ତି ଯେ, ତିନେଟା ଦେବରୀ ଗ୍ରାମରେ ରହୁଥିବା ଏହି ପିଲା ମାନେ ସମସ୍ତେ ସମ୍ପର୍କୀୟ । ସେମାନେ ଏକ ଟ୍ରାକ୍ଟରରେ ପାଣି ଟ୍ୟାଙ୍କର ନେଇ ଯାଉଥିଲେ । ୧୮ ବର୍ଷିୟ ଧର୍ମେନ୍ଦ୍ର ଠାକୁର ଟ୍ରାକ୍ଟର ଚଲାଉଥିଲେ । ସୋମବାର ଧର୍ମେନ୍ଦ୍ରର ଭଉଣୀର ବିବାହ ଉତ୍ସବ ଥିଲା । ତେବେ ଘର ଠାରୁ ୫୦୦ ମିଟର ଦୂରରେ ଟ୍ରାକ୍ଟରଟି ଭାରସାମ୍ୟ ହରାଇ ରାସ୍ତା ପାର୍ଶ୍ବ କ୍ଷେତକୁ ଓଲଟି ପଡିଥିଲା ।
