ବିଜାପୁର, ଛତିଶଗଡ଼ର ଭୈରମଗଡ଼ ଥାନା ଅନ୍ତର୍ଗତ କେଶକୁତୁଲ ଜଙ୍ଗଲରେ ରବିବାର ସକାଳ ପ୍ରାୟ ୫ଟା ୩୦ ସମୟରେ ସୁରକ୍ଷାବଳଙ୍କ ସହିତ ସଂଘର୍ଷ ବେଳେ ଜଣେ ନକ୍ସଲ ପ୍ରାଣ ହରାଇଛି । ଘଟଣାସ୍ଥଳରୁ ସମ୍ପୃକ୍ତ ନକ୍ସଲର ଶବ ଜବତ ହୋଇଛି । ଏହା ବ୍ୟତୀତ ଅସ୍ତ୍ରଶସ୍ତ୍ର, ବିସ୍ଫୋଟକ ଏବଂ ଅନ୍ୟାନ୍ୟ ନକ୍ସଲ ବ୍ୟବହୃତ ସାମଗ୍ରୀ ମଧ୍ୟ ଜବତ ହୋଇଛି ।
ସୂଚନା ଅନୁସାରେ, କେଶକୁତୁଲ-କେଶାମୁଣ୍ଡି ଜଙ୍ଗଲରେ ନକ୍ସଲଙ୍କ ଡିଭିଜନ ସପ୍ଲାଇ ର ଟିମ୍ କମାଣ୍ଡର କବାସି ପଣ୍ଡରୁ ଏବଂ ଅନ୍ୟ ୧୫ରୁ ୨୦ ଜଣ ନକ୍ସଲଙ୍କ ଉପସ୍ଥିତି ସମ୍ପର୍କରେ ସୂଚନା ପାଇ ଡିଆରଜି ବିଜାପୁରର ଯବାନ ମାନେ ସର୍ଚ୍ଚ ଅପରେସନ ଚଳାଇଥିଲେ । ନକ୍ସଲଙ୍କ କୋର୍ ଏରିଆରେ ସୁରକ୍ଷାବଳର ଯବାନମାନେ ପହଂଚିବା ପରେ ନକ୍ସଲ ମାନେ ଯବାନଙ୍କ ଉପରକୁ ଗୁଳି ଚଳାଇଥିଲେ । ଏହାପରେ ଯବାନମାନେ ଏହାର ପାଲଟା ଜବାବ ରଖିଥିଲେ । ଯବାନ ଓ ନକ୍ସଲଙ୍କ ମଧ୍ୟରେ ଏହି ଗୁଳି ବିନିମୟ ବେଳେ ଜଣେ ନକ୍ସଲ ନିହତ ହୋଇଛି ।
