ପାଟଣା,ରାଜଧାନୀ ପାଟଣାର କଂକଡ଼ବାଗ ଥାନା ଅନ୍ତର୍ଗତ ରାମଲକ୍ଷ୍ମଣ ରାସ୍ତାରେ ମଙ୍ଗଳବାର ଏକ ଭୀଷଣ ସଡ଼କ ଦୁର୍ଘଟଣାରେ ୭ ଜଣଙ୍କ ମୃତ୍ୟୁ ଘଟିଛି । ଜଣେ ଗୁରୁତର ହୋଇଛନ୍ତି । ଆହତଙ୍କୁ ଡାକ୍ତରଖାନାରେ ଭର୍ତି କରାଯାଇଛି । ଖବର ପାଇ ପୋଲିସ ଘଟଣାସ୍ଥଳରେ ପହଂଚି ତଦନ୍ତ କରୁଛି ।
ପାଟଣାର ନୂଆ ବାଇପାସ୍ ସ୍ଥିତ ରାମଲକ୍ଷ୍ମଣ ରାସ୍ତା ୩୦ ନମ୍ବର ଜାତୀୟ ରାଜପଥରେ ଏକ ଯାତ୍ରୀବାହୀ ଅଟୋ ଭାରସାମ୍ୟ ହରାଇ ମେଟ୍ରୋ କାର୍ଯ୍ୟରେ ନିୟୋଜିତ ଥିବା ଏକ ହାଇଡ୍ରା କ୍ରେନ୍ ସହିତ ଧକ୍କା ହୋଇଥିଲା । ଅଟୋରେ ଯାତ୍ରା କରୁଥିବା ମୋଟ୍ ୮ ଜଣ ଯାତ୍ରୀଙ୍କ ମଧ୍ୟରୁ ୭ ଜଣଙ୍କ ମୃତ୍ୟୁ ଘଟିଥିବା ବେଳେ ଜଣେ ଗୁରୁତର ହୋଇଛନ୍ତି । ମୃତକ ମାନଙ୍କ ମଧ୍ୟରେ ରହିଛନ୍ତି ଦୁଇ ଶିଶୁ ସହିତ ଯୁବକ ଓ ମହିଳା । ଆହତଙ୍କୁ ନୂଆ ବାଇପାସ୍ ସ୍ଥିତ ଏକ ଘରୋଇ ହସ୍ପିଟାଲରେ ଭର୍ତି କରାଯାଇଛି । ଘଟଣା ପରେ ଅଟୋ ଚାଳକ ସେଠାରୁ ଫେରାର୍ ହୋଇଯାଇଛି । ପୋଲିସ ଘଟଣାର ତଦନ୍ତ କରୁଛି । ୭ ମୃତକଙ୍କ ଶବ ଜବତ କରି ବ୍ୟବଚ୍ଛେଦ ନିମନ୍ତେ ପଠାଇଛି ।
