ଜୟପୁର– ସଂସ୍କୃତ ବିଭାଗ ପକ୍ଷରୁ ସୋମବାର ଓଡ଼ିଶା କେନ୍ଦ୍ରୀୟ ବିଶ୍ବବିଦ୍ୟାଳୟରେ ‘ଆଧୁନିକ ପରିପ୍ରେକ୍ଷୀରେ ପ୍ରାଚୀନ ଭାରତୀୟ ସାହିତ୍ୟରେ ବିଜ୍ଞାନ ଓ ପ୍ରଯୁକ୍ତିବିଦ୍ୟା’ ଶୀର୍ଷକ ତିନିଦିନିଆ ଆନ୍ତର୍ଜାତିକ ସମ୍ମିଳନୀ ଉଦ୍ଘାଟିତ ହୋଇଯାଇଛି। ଏପ୍ରିଲ ୮ରୁ ୧୦ ତାରିଖ ପର୍ଯ୍ୟନ୍ତ ଚାଲିବାକୁ ଥିବା ଏହି ସେମିନାରରେ ୪ଟି ବିଶ୍ଵବିଦ୍ୟାଳୟର ବିଶିଷ୍ଟ କୁଳପତି ଓ ଅନ୍ୟ ପ୍ରତିନିଧିମାନେ ଯୋଗ ଦେଇଥିଲେ। ଏହି କାର୍ଯ୍ୟକ୍ରମକୁ ଓଡ଼ିଶା କେନ୍ଦ୍ରୀୟ ବିଶ୍ଵବିଦ୍ୟାଳୟର କୁଳପତି ପ୍ରଫେସର ଚକ୍ରଧର ତ୍ରିପାଠୀ ଆନୁଷ୍ଠାନିକ ଭାବେ ଉଦ୍ଘାଟନ କରିଥିଲେ। ଅନ୍ୟମାନଙ୍କ ମଧ୍ୟରେ ଜାତୀୟ ସଂସ୍କୃତ ବିଶ୍ଵବିଦ୍ୟାଳୟ, ନୂଆଦିଲ୍ଲୀର କୁଳପତି ପ୍ରଫେସର ଶ୍ରୀନିବାସ ବରାଖେଡି, ତିରୁପତି ସ୍ଥିତ ଜାତୀୟ ସଂସ୍କୃତ ବିଶ୍ଵବିଦ୍ୟାଳୟର କୁଳପତି ପ୍ରଫେସର ଜିଏସଆର କ୍ରିଷ୍ଣା ମୂର୍ତ୍ତି, ରାମଟେକ ସ୍ଥିତ କବି କୁଳଗୁରୁ କାଳିଦାସ ସଂସ୍କୃତ ବିଶ୍ଵବିଦ୍ୟାଳୟର କୁଳପତି ପ୍ରଫେସର ହରେରାମ ତ୍ରିପାଠୀ, ବିହାରର କାମେଶ୍ଵର ସିଂହ ଦରଭଙ୍ଗା ସଂସ୍କୃତ ବିଶ୍ଵବିଦ୍ୟାଳୟର କୁଳପତି ପ୍ରଫେସର ଲକ୍ଷ୍ମୀ ନିବାସ ପାଣ୍ଡେ, ଓଡ଼ିଶା କେନ୍ଦ୍ରୀୟ ବିଶ୍ଵବିଦ୍ୟାଳୟର ପରାମର୍ଶଦାତା ପ୍ରଫେସର ଭି.ସି. ଝା ପ୍ରମୁଖ ଉପସ୍ଥିତ ଥିଲେ। ଆନ୍ତର୍ଜାତିକ ସମ୍ମିଳନୀର ଆବାହକ ତଥା ବିଶ୍ଵବିଦ୍ୟାଳୟର ଭାରପ୍ରାପ୍ତ ରେଜିଷ୍ଟ୍ରାର ତଥା ଅର୍ଥ ଅଧିକାରୀ ପ୍ରଫେସର ନରସିଂହ ଚରଣ ପଣ୍ଡା ସ୍ଵାଗତ ଭାଷଣ ଦେଇଥିଲେ।
ଓଡ଼ିଶା କେନ୍ଦ୍ରୀୟ କୁଳପତି ପ୍ରଫେସର ତ୍ରିପାଠୀ ସମ୍ମିଳନୀ ପାଇଁ ଶୁଭେଚ୍ଛା ଜଣାଇବା ସହ ସମ୍ମିଳନୀର ଅଭିଭାଷଣ ବେଶ୍ ଫଳପ୍ରଦ ହେବ ବୋଲି ଆଶାବ୍ୟକ୍ତ କରିଥିଲେ। ପ୍ରଫେସର ଏନ୍ ସି ପଣ୍ଡା ସମସ୍ତ ଅତିଥିଙ୍କୁ ସ୍ଵାଗତ କରିବା ସହ ଏକ ନିଆରା ଆଲୋଚନାଚକ୍ର ଯେଉଁଥିରେ ଗୋଟିଏ ମଞ୍ଚରେ ୫ ଜଣ ବିଶିଷ୍ଟ କୁଳପତି ଉପସ୍ଥିତ ଥିଲେ ।
ଏହି ଅବସରରେ ପ୍ରଫେସର ବରଖେଡି କେବଳ ସାହିତ୍ୟ କ୍ଷେତ୍ରରେ ନୁହେଁ ବରଂ ବିଜ୍ଞାନ ଓ ପ୍ରଯୁକ୍ତିବିଦ୍ୟାର ବିକାଶ କ୍ଷେତ୍ରରେ ସଂସ୍କୃତ ଭାଷାର ବିକାଶ ଉପରେ ଗୁରୁତ୍ଵାରୋପ କରିଥିଲେ । ଯଦି ଆମେ ବିକଶିତ ଭାରତକୁ ହାସଲ କରିବାକୁ ଚାହୁଁଛୁ, ତେବେ ଆମକୁ ବିଜ୍ଞାନ ଓ ପ୍ରଯୁକ୍ତି ବିଦ୍ୟା ସମେତ ସମସ୍ତ ବିଭାଗର ପ୍ରାଚୀନ ଭାରତୀୟ ପରମ୍ପରାକୁ ପୁନରୁଦ୍ଧାର କରିବାକୁ ହେବ। ଭାରତ ଅର୍ଥନୈତିକ ଦୃଷ୍ଟିରୁ ଏକ ସମୃଦ୍ଧ ଦେଶ ଥିଲା, କିନ୍ତୁ ବିଭିନ୍ନ ବିଦେଶୀ ଆକ୍ରମଣରୁ ଲୁଟ୍ ଯୋଗୁଁ ପରବର୍ତ୍ତୀ ସମୟରେ ଏହାର ମେରୁଦଣ୍ଡ ଭାଙ୍ଗି ପଡିଥିଲା। କିନ୍ତୁ, ଆମେ ବିକାଶ ପାଇଁ ଲଢ଼େଇ କରିବୁ। ଏଥିପାଇଁ ସ୍ଵଦେଶୀ ଜ୍ଞାନର ବିକାଶ ହେବା ଦରକାର ବୋଲି ସେ କହିଛନ୍ତି।
ପ୍ରଫେସର କ୍ରିଷ୍ଣା ମୂର୍ତ୍ତି ତାଙ୍କ ଅଭିଭାଷଣରେ ଦେଶରେ ସାମଗ୍ରିକ ସାହିତ୍ୟର ବିକାଶ ପାଇଁ ସଂସ୍କୃତ ଭାଷା ଓ ସାହିତ୍ୟର ପୁନରୁଦ୍ଧାର ପାଇଁ ଆହ୍ଵାନ ଦେଇଥିଲେ। ସେ କହିଥିଲେ ଯେ, ସଂସ୍କୃତ ଭାଷାକୁ ବହୁମୁଖୀ ଏବଂ ଅଧ୍ୟୟନ ପାଇଁ ସମସ୍ତ ବିଷୟ ସହିତ ମିଶ୍ରଣ କରାଯିବା ଉଚିତ୍ । ବୃକ୍ଷରୋପଣ ଓ ବିଜ୍ଞାନ ପରସ୍ପର ସହ ଜଡ଼ିତ । ତେଣୁ ବୃକ୍ଷରୋପଣ ଦ୍ଵାରା ବୈଜ୍ଞାନିକ ବିକାଶ ହୋଇପାରିବ ବୋଲି ସେ କହିଛନ୍ତି।
ଏହି ଆନ୍ତର୍ଜାତିକ ଆଲୋଚନାଚକ୍ର ସମଗ୍ର ବିଶ୍ଵରେ ସଂସ୍କୃତ ଭାଷାର ବିକାଶ ଦିଗରେ ବେଶ୍ ଫଳପ୍ରଦ ଓ ସହାୟକ ହେବ ବୋଲି ପ୍ରଫେସର ହରେରାମ ତ୍ରିପାଠୀ ଆଶାବ୍ୟକ୍ତ କରିଥିଲେ। ପ୍ରଫେସର ପାଣ୍ଡେ ଭାରତୀୟ ପାରମ୍ପରିକ ଜ୍ଞାନ ପ୍ରଣାଳୀର ବିକାଶ ସହ ଜ୍ଞାନ ଓ ଐତିହ୍ୟରେ ସମୃଦ୍ଧ ସଂସ୍କୃତ ଭାଷାର ବିକାଶ ଉପରେ ଗୁରୁତ୍ଵାରୋପ କରିଥିଲେ । ପ୍ରଫେସର ଝା କହିଥିଲେ ଯେ, ସେମିନାରର କାର୍ଯ୍ୟକଳାପକୁ ସଠିକ ଭାବରେ ଦସ୍ତାବିଜ କରାଯାଇ ଦେଶକୁ ପ୍ରଦର୍ଶିତ କରାଯିବା ଉଚିତ ଯାହାଦ୍ଵାରା ଏହି ସେମିନାର ଅନନ୍ୟ ହେବ । ସଂସ୍କୃତ ଅଧ୍ୟାପକ ଡ. ବୀରେନ୍ଦ୍ର ଷଡ଼ଙ୍ଗୀ ଧନ୍ୟବାଦ ଅର୍ପଣ କରିଥିଲେ। ଏହି କାର୍ଯ୍ୟକ୍ରମକୁ ଡ. ପ୍ରଦୀପ ଚନ୍ଦ୍ର ଆଚାର୍ଯ୍ୟ ପରିଚାଳନା କରିଥିଲେ। ଉଦ୍ଘାଟନୀ ସମାରୋହରେ ସମଗ୍ର ଭାରତବର୍ଷର ବହୁ ପ୍ରତିନିଧି, ବିଶ୍ଵବିଦ୍ୟାଳୟର ଅଧ୍ୟାପକ ଓ ଛାତ୍ରଛାତ୍ରୀ ଯୋଗ ଦେଇଥିଲେ।
ଉଦ୍ଘାଟନୀ କାର୍ଯ୍ୟକ୍ରମ ପୂର୍ବରୁ ଏହି ଅବସରରେ ବୃକ୍ଷରୋପଣ କାର୍ଯ୍ୟକ୍ରମ ଓ ମାଣ୍ଡିଆ ଖାଦ୍ୟ ପ୍ରଦର୍ଶନୀ ଆୟୋଜନ କରାଯାଇଥିଲା।
