ଭୁବନେଶ୍ୱର/ନିରାକାରପୁର, ଗୋମାଂସ ବୋଝେଇ କଂଟେନର ଜବତ ହୋଇଛି । କଂଟେନରରେ ୧୫ଟନରୁ ଉର୍ଦ୍ଧ୍ବ ଗୋମାଂସ ଚାଲାଣ କରାଯାଉଥିଲା । ଏହି ଘଟଣାରେ ଦୁଇ ଅଭିଯୁକ୍ତଙ୍କୁ ଅଟକ ରଖାଯାଇଛି । ଗୋମାଂସ ବୋଝେଇ କଣ୍ଟେନରକୁ ସୁରକ୍ଷା ଦେଇ ଯାଉଥିବା ଏକ କାରରେ ଥିବା ସମସ୍ତ ଅଭିଯୁକ୍ତ ଫେରାର ହୋଇଯାଇଛନ୍ତି।
ସୂଚନାରୁ ଜଣାପଡିଛି ଏକ ଗୋମାଂସ ବୋଝେଇ କଣ୍ଟେନର କଟକ ତିଗିରିଆରୁ ବାହାରି ପିପିଲି, ନିମପଡା, ନିରାକାରପୁର ଦେଇ ହାଇଦ୍ରାବାଦ ଚାଲାଣ ହେଉଥିବା ବେଳେ ନିରାକାରପୁର ରେଳଫାଟକ ପୂର୍ବରୁ ଗାଡିଟିକୁ ପିଛା କରି ହିନ୍ଦୁ ସଂଗଠନର ସଦସ୍ୟ ମାନେ ଗାଡିଟିକୁ ଅଟକାଇଥିଲେ । ଏହି ଗାଡିରୁ ଦୁଇ ଅଭିଯୁକ୍ତଙ୍କୁ ଧରାଯାଇଛି। ଖବର ପାଇ ନିରାକାରପୁର ପୋଲିସ ଘଟଣା ସ୍ଥଳରେ ପହଞ୍ଚି ଗୋମାଂସ ବୋଝେଇ କଣ୍ଟେନରକୁ ଜବତ କରି ଦୁଇ ଅଭିଯୁକ୍ତକୁ ଥାନାରେ ଅଟକ ରଖି ତଦନ୍ତ ଜାରି ରଖିଛି। ଏତେ ପରିମାଣର ଗୋମାଂସ କେଉଁଠୁ ଆସିଲା କୁଆଡେ ଯାଉଥିଲା ଏଥିରେ କେଉଁ ମାନେ ସଂପୃକ୍ତ ଅଛନ୍ତି ତାହାକୁ ନେଇ ନିରାକାରପୁରରେ ଚାପା ଊତ୍ତେଜନା ସୃଷ୍ଟି ହୋଇଛି। ଅନ୍ୟ ଫେରାର ଅଭିଯୁକ୍ତମାନଙ୍କ ଟେର ପାଇ ନାହିଁ ପୋଲିସ।
