ରାମଲୀଲା ମୈଦାନରେ ବିରୋଧୀ ଇଣ୍ଡି ମେଂଟର ମହାରାଲି

• ଟ୍ରାଫିକ ପୋଲିସ ପକ୍ଷରୁ ନିର୍ଦ୍ଦେଶାବଳୀ ଜାରି

ନୂଆଦିଲ୍ଲୀ,ଦିଲ୍ଲୀର ରାମଲୀଳା ମୈଦାନରେ ରବିବାର ବିରୋଧୀ ଇଣ୍ଡି ମେଂଟର ମହାରାଲି ଆରମ୍ଭ ହେଉଛି । ଏହି ମହାରାଲିରେ ସାରା ଦେଶରୁ ବିରୋଧୀ ଦଳର ବଡ ବଡ ନେତା ଓ କାର୍ଯ୍ୟକର୍ତ୍ତା ଏକତ୍ରିତ ହେବେ । ରାମଲୀଳା ମୈଦାନରେ ଏକ ବଡ ମଂଚ ପ୍ରସ୍ତୁତ ହୋଇଛି । ଯେଉଁଠାରେ ବିରୋଧୀ ଇଣ୍ଡି ମେଂଟର ସମସ୍ତ ବଡ ବଡ ନେତା ମିଳିତ ସଭାକୁ ସମ୍ବୋଧିତ କରିବେ । ରାଲିରେ ସୁନୀତା କେଜରିୱାଲ, ହେମନ୍ତ ସୋରେନଙ୍କ ପତ୍ନୀ କଳ୍ପନା ସୋରେନ, ଅଖିଳେଶ ଯାଦବ, ତେଜସ୍ୱୀ ଯାଦବ, ମଲିକାର୍ଜୁନ ଖଡକେ, ରାହୁଲ ଗାନ୍ଧୀଙ୍କ ସମେତ ବହୁ ବଡ ବଡ ନେତା ଉପସ୍ଥିତ ରହିବେ ।

ରାଲି ବେଳେ ମୈଦାନ ଆଖପାଖ ଅଂଚଳରେ ପୋଲିସ ବଳ ମୁତୟନ କରାଯାଇଛି । ମୈଦାନରେ ପ୍ରାୟ 20ହଜାର ଲୋକଙ୍କୁ ଏକାଠି ହେବାକୁ ଅନୁମତି ଦିଆଯାଇଛି । ପେଣ୍ଡାଲରେ ସିସିଟିଭି କ୍ୟାମେରା, ମେଟାଲ ଡିଟେକ୍ଟର ଲଗାଯାଇଛି । ସୁରକ୍ଷାକୁ ନେଇ ପୋଲିସ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି । ରାଲିକୁ ନେଇ ଟ୍ରାଫିକ ପୋଲିସ ପକ୍ଷରୁ ମଧ୍ୟ ଆଡଭାଇଜରି ଜାରି କରାଯାଇଛି ।