ଭୁବନେଶ୍ୱର. କଂଗ୍ରେସ ବିଧାୟକ ସୁର ରାଉତରାୟଙ୍କ ସାନ ପୁଅ ମନ୍ମଥ ରାଉତରାୟ ବୁଧବାର ଦିନ ବିଜୁ ଦଳରେ ସାମିଲ ହୋଇଛନ୍ତି । ଶହ ଶହ ସମର୍ଥକଙ୍କ ସହ ଆସି ବିଜେଡିରେ ଯୋଗ ଦେଇଛନ୍ତି ମନ୍ମଥ ।
ସାଂସଦ ମାନସ ମଙ୍ଗରାଜ ତାଙ୍କୁ ବିଜେଡିକୁ ସ୍ୱାଗତ କରିଛନ୍ତି ।
ଏହି ଅବସରରେ ମନ୍ମଥ କହିଛନ୍ତି ଯେ ସେ ତାଙ୍କର ପିତାଙ୍କ ଆଶିର୍ବାଦ ନେଇ ଆଜି ଆସିଛି । ବିଜୁ ବାବୁ ହେଉଛନ୍ତି ମୋ ଆଦର୍ଶ । ମୁଁ ପାଠ ପଢୁଥିବା ବେଳେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମୋତେ ସ୍କଲାରସିପ୍ ପ୍ରଦାନ କରିଥିଲେ, ସେ ସମୟକୁ କେବେ ଭୁଲିପାରିବି ନାହିଁ ।
ସେ କହିଛନ୍ତି ଯେ ପ୍ରଥମଥର ପାଇଁ ତାଙ୍କ ପିତାଙ୍କ ଠାରୁ ଅଲଗା ହୋଇ ରାଜନୀତିର ମଞ୍ଚରେ ବସିଛି । ମୋ ଉପରେ ବାବାଙ୍କ ଆଶିର୍ବାଦ ରହିଛି । ସେ ମୋତେ ସଦାବେଳେ ଶିଖାଇ ଆସିଛନ୍ତି, ଯେଉଁ ଦଳରେ ରହିବ, ସେଠି ଶେଷ ଯାଏଁ ଜଣେ କର୍ମୀ ତଥା ସୈନ୍ୟ ଭାବରେ କାମ କରିବ ବୋଲି ସେ ପ୍ରକାଶ କରିଛନ୍ତି ।
