ଜୟପୁର ସଦର ଥାନା ଅନ୍ତର୍ଗତ ବାମୁଣି ଗାଁ ନୁଆଗୁଡାରେ ସ୍ୱାମୀ ରମେଶ ପରଜା ଓରଫ ବାଘ ଓ ସ୍ତ୍ରୀ ଡମୁଣି ପରଜା ଓରଫ ହରିଜନ ଏକାଠି ରହୁଥିଲେ ଓ ଶ୍ରମିକ ଭାବେ କାର୍ଯ୍ୟ କରୁଥିଲେ । ସ୍ୱାମୀ ରମେଶ ସ୍ତ୍ରୀ ଡମୁଣିକୁ ୩ ଶହ ଟଙ୍କା ଦେଇଥିଲେ । ସେହି ୩ ଶହ ଟଙ୍କାରେ ଡମୁଣି ଘର ଜିନିଷ କିଣି ଦେଇ ଖର୍ଚ୍ଚ କରିଦେଇଥିଲେ । ଗତ ୨ ତାରିଖ ରାତିରେ ସ୍ୱୀମୀ ରମେଶ ମଦ ପିଇ ଆସି ୩ ଶହ ଟଙ୍କା ମାଗିଥିଲେ । କିନ୍ତୁ, ଡମୁଣି ଉକ୍ତ ୩ ଶହ ଟଙ୍କାରେ ଘର ଜିନିଷ କିଣି ଦେଇଥିବା ପ୍ରକାଶ କରିବାକୁ ରମେଶ ତାକୁ ବିଧା, ଗୋଇଠା ମାରିବା ସହ ପଥରରେ ମୁଣ୍ଡକୁ ଛେଚି ଦେଇଥିଲା । ଫଳରେ ତାଙ୍କର ମୃତ୍ୟୁ ଘଟିଥିଲା । ଏକଥା କାହାକୁ ପ୍ରଘଟ ନକରି ତାଙ୍କର କେତେକ ବନ୍ଧୁକୁ ଜଣାଇ ଶୁକ୍ରବାର ଅପରାହ୍ନ ୧୧ ଟା ସମୟରେ ଶ୍ମଶାନରେ ନେଇ ଶବକୁ ପୋତି ଦେଇଥିଲା । ଏହି ଖବର ପାଇ ମୃତ ଡ଼ମୁଣିର ଭାଇ ସଦର ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗ ପାଇ ପୋଲିସ ଦଫା ୩୦୨,୨୮୧ ବଳରେ ୩ /୨୦ ରେ ଏକ ମାମଲା ରୁଜୁ କରିଛି । ମାମଲାର ତଦନ୍ତକାରୀ ଅଧିକାରି ଶିବ ଶଙ୍କର ସାହୁ ମାଜିଷ୍ଟ୍ରେଟଙ୍କ ଉପସ୍ଥିତିରେ ଆଜି ଶବକୁ ମାଟିତଳୁ ଉଦ୍ଧାର କରି ବ୍ୟବଚ୍ଛେଦ ନିମନ୍ତେ ପଠାଇଛନ୍ତି । ଘଟଣାସ୍ଥଳରେ ଏଏସପି ଉତ୍ପଳ ରଞ୍ଜନ ଦାସ, ଜୟପୁର ଏସଡିପିଓ ବରୁଣ ଗୁଣ୍ଠପାଲି, ବୋରିଗୁମ୍ମା ଏସଡିପିଓ ହରେକୃଷ୍ଣ ମାଝିଙ୍କ ସମେତ ସଦର ଓ ଟାଉନ ପୋଲିସ ଉପସ୍ଥିତ ରହିଥିଲେ ।
