ଧର୍ମଶାଳା,ଆଜି ସକାଳୁ ଗାଁ ଗଣ୍ଡାରେ ସବୁ ମନ୍ଦିରରେ ମହାଶିବରାତ୍ରି ପାଇଁ ଭକ୍ତ ଚଳଚଂଚଳ । ଏହି ପର୍ବ ଚାଲିଥିବା ବେଳେ ଦୁର୍ଘଟଣା ଘଟି ଜୀବନ ଯିବା ଘଟଣାକୁ ନେଇ ଗ୍ରାମରେ ଶୋକାକୂଳ ପରିବେଶ । ଏଭଳି ଘଟଣା ଘଟିଛି ଯାଜପୁର ଜିଲା ୫୩ ନଂ ଜାତୀୟ ରାଜପଥ କବାଟବନ୍ଧସ୍ଥିତ ବ୍ରାହ୍ମଣୀ ନିକଟରେ । ରାସ୍ତା ପାରି ହେଉଥିବା ସମୟରେ ଯୁବକକୁ ଧକ୍କା ଦେଇଥିବା ଏକ ବାଇକ୍ । ଏହି ଘଟଣାରେ ଜଣଙ୍କର ମୃତ୍ୟୁ ଘଟିଥିବା ବେଳେ ଅନ୍ୟ ୨ ଜଣ ଗୁରୁତର ଆହତ ହୋଇଥିବା ଜଣାପଡିଛି । ମୃତ ଯୁବକ ଜଣକ ହେଲେ ସ୍ଥାନୀୟ ରାଇଛନ୍ଦା ଗ୍ରାମର ଅଶୋକ ସାହୁ ବୋଲି ଜଣାପଡିଛି ।
ମିଳିଥିବା ସୁଚନା ମୁତାବକ, ଆଜି ସକାଳ ସମୟରେ କବାଟବନ୍ଧ ଅଂଚଳରେ ମହାଶିବରାତ୍ରି ପାଇଁ ଉତ୍ସବ ମୁଖର ହୋଇ ଉଠିଥିଲା । ଆଜି ସକାଳେ କୌଣସି କାମ ନେଇ ଆଶୋକ ଘରୁ ବାହାରି ବଜାରକୁ ଆସିବା ସମୟରେ ନିକଟସ୍ଥ ବ୍ରିଜ୍ ନିକଟରେ ତାଙ୍କୁ ଏକ ବାଇକ୍ ଧକ୍କା ଦେଇଥିଲା । ଆଶୋକଙ୍କ ସମେତ ବାଇକ୍ରେ ଥିବା ଅନ୍ୟ ୨ ଜଣ ଯୁବକ ଗୁରୁତର ଆହତ ହୋଇଥିଲେ । ସେମାନଙ୍କୁ ଧର୍ମଶାଳା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତି କରାଯାଇଥିଲା । ସେଠାରେ ଡାକ୍ତର ଆଶୋକଙ୍କୁ ମୃତ ଘୋଷଣା କରିଥିଲେ । ଅନ୍ୟ ୨ ଜଣଙ୍କୁ ପ୍ରାଥମିକ ଚିକିତ୍ସା ପରେ କଟକ ବଡ ମେଡିକାଲକୁ ପଠାଇ ଦିଆଯାଇଥିଲା । ଏହି ଖବର ପ୍ରଚାରିତ ହେବା ପରେ ରାଇଛନ୍ଦା ଗ୍ରାମରେ ଶୋକାକୂଳ ପରିବେଶ ସୃଷ୍ଟି ହୋଇଥିଲା । ଖବର ପାଇ ସ୍ଥାନୀୟ ଲୋକେ ଉତ୍ୟକ୍ତ ହୋଇ କ୍ଷତି ପୁରଣ ଦାବି କରି ରାସ୍ତା ଅବରୋଧ କରିଥିଲେ । ଘଟଣାସ୍ଥଳରେ ଜେନାପୁର ପୋଲିସ ପଂହଚିବା ପରେ ଉତ୍ୟକ୍ତ ଲୋକଙ୍କ ସହ ଆଲୋଚନା ପରେ ରାସ୍ତା ଅବରୋଧ ହଟିଥିଲା । ଜେନାପୁର ପୋଲିସ ମେଡିକାଲରେ ପଂହଚି ଶବ ଜବତ କରି ଶବ ବ୍ୟବଚ୍ଛେଦ ପାଇଁ ଧର୍ମଶାଳା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରର ଶବ ବ୍ୟବଚ୍ଛେଦ ଗୃହକୁ ପଠାଇ ଘଟଣାର ତଦନ୍ତ ଆରମ୍ଭ କରିଥିଲା । ପୂର୍ବାହ୍ନରେ ଶବ ବ୍ୟବଚ୍ଛେଦ ପରେ ଶବ ଗ୍ରାମରେ ପଂହଚିବା ପରେ ଶୋକାକୂଳ ପରିବେଶ ସୃଷ୍ଟି ହୋଇଥିଲା ।
