ଗଞ୍ଜାମ, ଗଞ୍ଜାମ ଜିଲ୍ଲା ସୋରଡ଼ା ପୋଲିସ ଗତକାଲି ରାତିରେ ସୁରମଣି ଗ୍ରାମ ନଦୀହିଡ଼ରେ ଚାଲିଥିବା ଏକ ବଡ ଧରଣର ଜୁଆ ଆଡ୍ଡା ଉପରେ ଚଢ଼ଉ କରି ମୋଟ୍ ୧୧ ଜଣଙ୍କୁ ଗିରଫ କରିବାରେ ସଫଳ ହୋଇଛି । ଗିରଫଙ୍କ ମଧ୍ୟରେ ଜୁଆ ଆଡ୍ଡା ଚଳାଉଥିବା ସେହି ଗ୍ରାମର କର୍ଣ୍ଣ ବେହେରା ମଧ୍ୟ ରହିଛି । କର୍ଣ୍ଣ ନାମରେ ସୋରଡ଼ା ଥାନାରେ କେସ୍ ନଂ ୧/୧୦ ଓ ୧୦୬/୦୮ ଦୁଇଟି ମାମଲା ରହିଛି । ସେ ସ୍ଥାନୀୟ ଲୋକଙ୍କୁ ନେଇ ଗତ କିଛିଦିନ ହେଲା ସେଠାରେ ଜୁଆ ଆଡ୍ଡା ଚଳାଇଥିଲା । ଖେଳରେ ଜିତୁଥିବା ଲୋକଙ୍କୁ ଧମକ ଚମକ ଦେଇ ଟଙ୍କା ଆଦାୟ କରୁଥିଲା ।
ଗତକାଲି ରାତିରେ ଏସଆଇ କୈଳାସ ଚନ୍ଦ୍ର ସାହୁଙ୍କ ନେତୃତ୍ଵରେ ଏକ ଟିମ୍ ଉକ୍ତ ଜୁଆ ଆଡ୍ଡା ଉପରେ ଚଢ଼ଉ କରି କର୍ଣ୍ଣ ସମେତ ଅନ୍ୟ ୧୦ ଜଣଙ୍କୁ କାବୁ କରିଥିଲା । ସେମାନଙ୍କ ଠାରୁ ୫୧ ହଜାର ୪୦୦ ଟଙ୍କା, ୮ଟି ମୋବାଇଲ୍, ୬ଟି ଦୁଇ ଚକିଆ ଗାଡ଼ି ଏବଂ ଖଣ୍ଡା ଜବତ ହୋଇଛି ।
