ମାଲକାନଗିରି- କ୍ଷେତ ଜଗି ଥିବା ବେଳେ ବୃଦ୍ଧଙ୍କୁ ଟାଙ୍ଗିଆରେ ହାଣି ଅତ୍ୟନ୍ତ ନିର୍ମମ ଭାବେ ହତ୍ୟା କରାଯାଇଛି । ମୃତକଙ୍କ ନାମ ଦେବା ମାଡ଼କାମୀ (୫୮) । ଗତକାଲି ବିଳମ୍ବିତ ରାତିରେ ମାଲକାନଗିରି ଜିଲ୍ଲା କାଲିମେଳା ଥାନା ଅନ୍ତର୍ଗତ ଚିନ୍ତଲୱାଡ଼ା ପଂଚାୟତର ବାଟାଣିଗୁଡ଼ା ଗ୍ରାମରେ ଘଟିଯାଇଛି ଏଭଳି ବିଭତ୍ସ ହତ୍ୟା ।
ଗୁରୁବାର ରାତିରେ ଘରେ ଖାଇ ସାରିବା ପରେ ଗ୍ରାମ ଠାରୁ ଅନତି ଦୂରରେ ଥିବା ନିଜ କ୍ଷେତ ଜଗିବାକୁ ଯାଇଥିଲେ ବୃଦ୍ଧ ଜଣକ । ସେଠାରେ କେହି ଦୁର୍ବୃତ ଟାଙ୍ଗିଆ ସାହାଯ୍ୟରେ ତାଙ୍କ ଗଳାକାଟି ନିର୍ମମ ଭାବେ ହତ୍ୟା କରିଛି । ଆଜି ସକାଳୁ ଏ ସମ୍ପର୍କରେ ଖବର ପାଇ କାଲିମେଳା ଥାନା ଭାରପ୍ରାପ୍ତ ଅଧିକାରୀ ଶେଷଦେବ ବେହେରା ସଦଳବଳେ ଘଟଣାସ୍ଥଳରେ ପହଂଚି ଶବ ଜବତ କରିବା ସହ ଏହାକୁ ବ୍ୟବଚ୍ଛେଦ ନିମନ୍ତେ କାଲିମେଳା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ପଠାଇଛନ୍ତି । ଥାନା ପକ୍ଷରୁ ଏ ସଂକ୍ରାନ୍ତରେ ଏକ ହତ୍ୟା ମାମଲା ରୁଜ୍ଜୁ ହୋଇଛି । କିଏ ଓ କାହିଁକି ବୃଦ୍ଧଙ୍କୁ ଏପରି ନୃସଂଶ ଭାବେ ହତ୍ୟା କରିଛି, ହତ୍ୟାକାଣ୍ଡ ପଛରେ କ’ଣ କାରଣ ରହିଛି ପୋଲିସ ସେନେଇ ଛାନଭିନ୍ ଆରମ୍ଭ କରିଛି ।
