ଭୁବନେଶ୍ୱର– ବର୍ତମାନ ସମାଜରେ ଦେଖାଯାଉଥିବା ଅନିୟନ୍ତ୍ରିତ ତଥା ତ୍ରୁଟିପୂର୍ଣ୍ଣ ଜୀବନଶୈଳୀଜନିତ ନାନା ବ୍ୟାଧି ତଥା ଦିନକୁ ଦିନ ମାନବ ସମାଜ ନିମିତ ଆହ୍ୱାନ ପାଲଟୁଥିବା ବିଭିନ୍ନ ବୈଶ୍ୱିକ ସ୍ୱାସ୍ଥ୍ୟ ସମସ୍ୟାଗୁଡ଼ିକର ସଫଳ ମୁକାବିଲା କରିବାରେ ଫିଜିଓଲୋଜି(ଶରୀରତତ୍ୱ ବିଜ୍ଞାନ) ଏକ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିବ । ଅନ୍ତର୍ଜାତୀୟସ୍ତରରେ ଶରୀରତତ୍ୱ ବିଜ୍ଞାନ ଉପରେ ଅଧିକ ଗବେଷଣା, ମେଡିକାଲ୍ ପାଠ୍ୟକ୍ରମରେ ଏହାର ବ୍ୟାପକତା ଆଦି ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି । ଏନେଇ ଏହି ସନ୍ଦର୍ଭରେ ବ୍ୟାପକ ଗବେଷଣାର ଆବଶ୍ୟକତା ରହିଛି । ଏମ୍ସ ଭୁବନେଶ୍ୱର ଫିଜିଓଲୋଜି ବିଭାଗ ଦ୍ୱାରା ଆୟୋଜିତ ଅଭିନବ ଏମ୍ସ-ଫିଜିଓମିଟ୍ କର୍ମଶାଳାରେ ଏପରି ମତବ୍ୟକ୍ତ କରିଛନ୍ତି ଦେଶର ବିଶିଷ୍ଟ ଶରୀରତତ୍ୱ ବିଜ୍ଞାନୀଗଣ ।
ସମଗ୍ର ଦେଶରେ ଶରୀରତତ୍ୱ ବିଜ୍ଞାନ ଶିକ୍ଷା କ୍ଷେତ୍ରରେ ସହଭାଗିତା ବୃଦ୍ଧି କରିବା ଏବଂ ଗବେଷଣାକୁ ପ୍ରାଥମିକତା ଦେବା ଲକ୍ଷ୍ୟରେ, ଏହି ଦୁଇଦିନିଆ କର୍ମଶାଳାରେ ଦେଶର ୧୭ଟି ଏମ୍ସରୁ ୪୦ ରୁ ଊର୍ଧ୍ୱ ଖ୍ୟାତନାମା ଶରୀରତତ୍ୱ ବିଜ୍ଞାନୀ ଅଂଶଗ୍ରହଣ କରିଥିଲେ । ଉଦ୍ଘାଟନୀ ସମାରୋହରେ ବିଶିଷ୍ଟ ଶରୀରତତ୍ୱ ବିଜ୍ଞାନୀ ତଥା ଏମ୍ସ କଲ୍ୟାଣୀର କାର୍ଯ୍ୟନିର୍ବାହୀ ନିର୍ଦ୍ଦେଶକ ଡ. ରାମଜୀ ସିଂ, ଏମ୍ସ ଭୁବନେଶ୍ୱର କାର୍ଯ୍ୟନିର୍ବାହୀ ନିର୍ଦ୍ଦେଶକ ଡ. ଆଶୁତୋଷ ବିଶ୍ୱାସ, ଏମ୍ସ ପାଟ୍ନା କାର୍ଯ୍ୟନିର୍ବାହୀ ନିର୍ଦ୍ଦେଶକ ଡ. ଜି କେ ପାଲ୍, ଏମ୍ସ ଯୋଧପୁର କାର୍ଯ୍ୟନିର୍ବାହୀ ନିର୍ଦ୍ଦେଶକ ଡ. ମାଧବାନନ୍ଦ କର, ଏମ୍ସ ଭୁବନେଶ୍ୱର ଡିନ୍ ଡ. ପି ଆର ମହାପାତ୍ର, ମେଡିକାଲ୍ ଅଧୀକ୍ଷକ ଡ. ଡି କେ ପରିଡ଼ା, ଫିଜିଓଲୋଜି ବିଭାଗ ମୁଖ୍ୟ ଡ. ପ୍ରଣତୀ ନନ୍ଦ ପ୍ରମୁଖ ଉପସ୍ଥିତ ଥିଲେ ।
ଏମ୍ସ ଭୁବନେଶ୍ୱର କାର୍ଯ୍ୟନିର୍ବାହୀ ନିର୍ଦ୍ଦେଶକ ଡ. ଆଶୁତୋଷ ବିଶ୍ୱାସଙ୍କ ନେତୃତ୍ୱରେ ଏହି ଜାତୀୟ ଅନୁଷ୍ଠାନର ଫିଜିଓଲୋଜି ବିଭାଗରେ କୃତ୍ରିମ ବୁଦ୍ଧିମତା(ଏଆଇ)ର ବ୍ୟବହାରପୂର୍ବକ ବହୁ ଗବେଷଣାମୂଳକ କାର୍ଯ୍ୟ ହାତକୁ ନିଆଯାଇଛି । ସମଗ୍ର ଦେଶରେ ଏଆଇର ପ୍ରୟୋଗ ପୂର୍ବକ ଶରୀରତତ୍ୱ ବିଜ୍ଞାନ ସନ୍ଦର୍ଭରେ ବ୍ୟାପକ ଗବେଷଣା ହେବା ଆବଶ୍ୟକ ବୋଲି ଡ. ବିଶ୍ୱାସ ଅନୁଷ୍ଠିତ ଆଲୋଚନା କାଳରେ ମତ ରଖିଥିଲେ ।
ଅତିରିକ୍ତ ପ୍ରଫେସର ତଥା ଆୟୋଜନ କମିଟି ସମ୍ପାଦକ ଡ. କଳ୍ପନା ବାରହୱାଲ୍ ଏହି ନିଆରା କର୍ମଶାଳା ଏମ୍ସ ଭଳି ବିଭିନ୍ନ ଜାତୀୟ ଅନୁଷ୍ଠାନର ଗବେଷକଙ୍କ ପାଇଁ ଏକ ବିଶେଷ ସୁଯୋଗ ଆଣିବା ସହିତ ଅନୁଷ୍ଠାନଗୁଡ଼ିକ ମଧ୍ୟରେ ସୁକ୍ଷ୍ମ ସମ୍ପର୍କ ସ୍ଥାପନରେ ସହାୟକ ହେବାନେଇ ସୂଚନା ଦେଇଥିଲେ ।
ଗଭୀର ଜଳ, ପ୍ରଚଣ୍ଡ ତାତି, ଅତ୍ୟନ୍ତ ଉଚ୍ଚତାଯୁକ୍ତ ସ୍ଥାନରେ କାର୍ଯ୍ୟ, କାର୍ଯ୍ୟସ୍ଥଳ ଚାପ ଆଦିକୁ ନିୟନ୍ତ୍ରଣ କରିବା ଏବଂ ମିଲିଟାରୀ ଫିଜିଓଲୋଜିକୁ ସଶକ୍ତ କରିବା ନିମନ୍ତେ ଡିଆରଡିଓ ଭଳି ଅନୁଷ୍ଠାନଗୁଡ଼ିକ ସହିତ ଏମ୍ସ ଭଳି ପ୍ରସିଦ୍ଧ ଜାତୀୟ ସ୍ୱାସ୍ଥ୍ୟ ଅନୁଷ୍ଠାନର ସହଭାଗିତା ଜରୁରୀ । କର୍ମଶାଳାରେ ସାମରିକ ଶରୀରତତ୍ୱ ବିଜ୍ଞାନ ସମ୍ପର୍କରେ ଅନୁଷ୍ଠିତ ସ୍ୱତନ୍ତ୍ର କର୍ମଶାଳାରେ ଏପରି ମତ ରଖିଥିଲେ ଡିଫେନ୍ସ ଇନଷ୍ଟିଚ୍ୟୁଟ୍ ଅଫ୍ ଫିଜିଓଲୋଜି ଆଣ୍ଡ ଆଲିଏଡ୍ ସାଇନ୍େସସ୍ (ଡିଆଇପିଏସ୍), ଡିଆରଡିଓ ର ନିର୍ଦ୍ଦେଶକ ଡ. ରାଜୀବ ଭାରସ୍ନେ ।
