ଭୁବନେଶ୍ୱର-ଭୁବନେଶ୍ୱର ରିଜର୍ଭ ପୁଲିସ ଗ୍ରାଉଣ୍ଡରେ ୬୧ତମ ଗୃହରକ୍ଷୀ ଦିବସ ବୁଧବାର ଦିନ ମହାସମାରୋହରେ ପାଳିତ ହୋଇଛି । ଏହି ପରିପ୍ରେକ୍ଷୀରେ ଭୁବନେଶ୍ୱର ସହରାଂଚଳ ପୁଲିସ ବିଭାଗରେ କାର୍ଯ୍ୟରତ ଗୃହରକ୍ଷୀ ମାନଙ୍କ ଦ୍ୱାରା ଏକ ପ୍ୟାରେଡ କାର୍ଯ୍ୟକ୍ରମର ଆୟୋଜନ କରାଯାଇଥିଲା । କଟକ-ଭୁବନେଶ୍ୱର ଟ୍ୱିନସିଟିର ପୁଲିସ କମିଶନର ସୌମେନ୍ଦ୍ର ପ୍ରିୟଦର୍ଶି ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗ ଦେବା ସହ ପ୍ୟାରେଡ ଅଭିବାଦନ ଗ୍ରହଣ କରିଥିଲେ । ଅନ୍ୟ ଅତିଥି ମାନଙ୍କ ମଧ୍ୟରେ ଅତିରିକ୍ତ ପୁଲିସ କମିଶନର ବ୍ରିଜେଶ ରାଏ, ଗୃହରକ୍ଷୀ ବିଭାଗର କମାଣ୍ଡାଂଟ ତଥା ଭୁବନେଶ୍ୱର ଡିସିପି ପ୍ରତୀକ ସିଂହ,ଡେପ୍ୟୁଟି କମାଣ୍ଡାଂଟ ଅଶୋକ ପାଣିଗ୍ରାହୀଙ୍କ ସମେତ ବହୁ ବରିଷ୍ଠ ଅଧିକାରୀ ମାନେ ଏହି କାର୍ଯ୍ୟକ୍ରମରେ ଯୋଗଦେଇଥିଲେ । ଏହି ପରିପ୍ରେକ୍ଷିରେ ଶୃଙ୍ଖଳିତ ପ୍ୟାରେଡ ପ୍ରଦର୍ଶନ ପାଇଁ ଜ୍ୟୋତିରଞ୍ଜନ ସ୍ୱାଇଁ ଏବଂ ଶ୍ରୀମତୀ ସସ୍ମିତା ଦାସଙ୍କୁ ସମ୍ବର୍ଦ୍ଧିତ କରାଯାଇଥିଲା । ସେହିପରି ଉତମ ପୋଷାକ ପରିଧାନ ପାଇଁ ଦୀପକ କୁମାର ସାହୁଙ୍କୁ ସମ୍ବର୍ଦ୍ଧିତ କରାଯାଇଥିବା ସ୍ଥଳେ ଗୃହରକ୍ଷୀ ବିଭାଗରେ ଉତମ ଖ୍ୟାତିସମ୍ପନ୍ନ ପାଇଁ ଶ୍ରୀମତୀ ସୁଷମା ପ୍ରଧାନ ଏବଂ ଉତମ ଶୃଙ୍ଖଳିତ ଆଚରଣ ନିମନ୍ତେ ପ୍ରଣବ ପାଇକରାୟଙ୍କୁ ମଧ୍ୟ ସମ୍ବର୍ଦ୍ଧିତ କରାଯାଇଥିଲା । ସମାରୋହ ଅବସରରେ, “ରାଷ୍ଟ୍ରପତି, ରାଜ୍ୟପାଳ, ମୁଖ୍ୟମନ୍ତ୍ରୀ, କେନ୍ଦ୍ର ଗୃହ ସଚିବ, ହୋମ ଗାର୍ଡ କମାଣ୍ଡାଂଟ ଜେନେରାଲ, ଭାରତ ଏବଂ ହୋମ ଗାର୍ଡ ମହାନିର୍ଦ୍ଦେଶକ ଓଡ଼ିଶା” ଙ୍କ ପ୍ରଦତ ବାର୍ତା ମୁଖ୍ୟ ଅତିଥି ପଠନ କରିଥିଲେ ।
