ଜୟପୁର,କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରୀ ଅନୁରାଗ ଠାକୁର କହିଛନ୍ତି ଯେ, ରାଜସ୍ଥାନରେ ବିଜେପି ସରକାର ଗଠନ ହେବ । ରାଜ୍ୟର ଲୋକେ କଂଗ୍ରେସର କୁଶାସନରୁ ମୁକ୍ତି ପାଇବେ । ଗଣମାଧ୍ୟମ ସହ ଆଲୋଚନା ବେଳେ ଅନୁରାଗ ଠାକୁର ଏହା କହିଛନ୍ତି ।
ଅନୁରାଗ ଠାକୁର ଶନିବାର ଦିନିକିଆ ରାଜସ୍ଥାନ ଗସ୍ତ କରିଛନ୍ତି । ସେ ଜୟପୁର ଏୟାରପୋର୍ଟରେ ପହଞ୍ଚିବା ପରେ ସଡକ ପଥରେ ଆଜମେର ଯାଇଛନ୍ତି । ମେୟୋ କଲେଜର ସ୍ପୋର୍ଟସ ଡେ ଉଦଘାଟନ ପାଇଁ ସେ ଆଜମେର ଆସିଥିବା ସୂଚନା ମିଳିଛି ।
ଏହି ଅବସରରେ କେନ୍ଦ୍ରମନ୍ତ୍ରୀ କହିଛନ୍ତି ଯେ, କଂଗ୍ରେସର ସମ୍ପୂର୍ଣ୍ଣ ଭାବେ ମୁଖା ଖୋଲିଯାଇଛି । କେବଳ ଫଳାଫଳକୁ ଅପେକ୍ଷା । ଭୋଟ ଗଣନା ପରେ ସ୍ପଷ୍ଟ ହୋଇଯିବ ଯେ, ଭୋଟରମାନେ କଂଗ୍ରେସର କୁଶାସନକୁ ଶେଷ କରିଛନ୍ତି । ଲୋକଙ୍କ ଅପେକ୍ଷା ଶେଷ ହେବ, ରାଜ୍ୟବାସୀଙ୍କୁ ଗେହେଲଟ ସରକାରର କୁଶାସନରୁ ମୁକ୍ତି ମିଳିବ । ପଦ୍ମ ଫୁଟାଇବା ପାଇଁ ଲୋକେ ବିଜେପିକୁ ଆଶୀର୍ବାଦ ଦେଇଛନ୍ତି ବୋଲି କହିଛନ୍ତି ଅନୁରାଗ ଠାକୁର ।
