ଭୁବନେଶ୍ୱର– ଶ୍ରୀଜଗନ୍ନାଥଙ୍କ ଦର୍ଶନରୁ ବୟସ୍କ ଓ ରୋଗାକ୍ରାନ୍ତ ବ୍ୟକ୍ତିଙ୍କୁ ବାରଣ କରାଯିବା ନେଇ ଶ୍ରୀମନ୍ଦିର ମୁଖ୍ୟ ପ୍ରଶାସକ ଗତକାଲି ଦେଇଥିବା ମନ୍ତବ୍ୟକୁ କଂଗ୍ରେସ ବିଧାୟକ ତାରା ବାହିନୀପତି କଡ଼ା ନିନ୍ଦା କରିଛନ୍ତି । ଏପରିକି ଶ୍ରୀମନ୍ଦିର ମୁଖ୍ୟ ପ୍ରଶାସକ ରଂଜନ ଦାସଙ୍କୁ ନିଲମ୍ବିତ କରିବାକୁ ଦାବି କରିଛନ୍ତି କଂଗ୍ରେସ ଦଳ ମୁଖ୍ୟ ସଚେତକ ତଥା ବିଧାୟକ ତାରାପ୍ରସାଦ ବାହିନୀପତି । ଏମସରେ ତାଙ୍କ ଚିକିତ୍ସା କରାଯାଉ ବୋଲି ସେ ବିଦ୍ରୁପ କରିଛନ୍ତି । ତାରା କହିଛନ୍ତି, ଭଗବାନଙ୍କୁ ଦର୍ଶନ କରିବାର ଅଧିକାର ସମସ୍ତଙ୍କର ଅଛି ।
ସେହିପରି ବରିଷ୍ଠ କଂଗ୍ରେସ ନେତା ପ୍ରସାଦ ହରିଚନ୍ଦନ କହିଛନ୍ତି, ସରକାରଙ୍କ ଜିଦି ନବାବ ହୁସେନଙ୍କ ଜିଦିକୁ ବଳିଗଲା । ନବାବ ହୁସେନ, ଦାଣ୍ଡରେ କେହି ହରିନାମ ନେଇ ପାରିବେନି ବୋଲି କହିଥିଲେ । କୌଣସି ଧର୍ମ ବିରୋଧୀ ବ୍ୟକ୍ତି ମଧ୍ୟ ଏଭଳି କଟକଣା ଜାରି କରି ନଥିଲେ । କାର୍ତିକ ମାସରେ ପୁରୀକୁ ଦେଶର ବିଭିନ୍ନ ପ୍ରାନ୍ତ ଓ ବିଦେଶରୁ ଲୋକ ଜଗନ୍ନାଥ ଦର୍ଶନ ପାଇଁ ଆସନ୍ତି । ଦର୍ଶନ କରିବା ଆମ ଧାର୍ମିକ ଅଧିକାର, ସମ୍ବିଧାନ ସିଦ୍ଧ ଅଧିକାର । ଏହାକୁ ବିରୋଧ କରିବା ସମ୍ବିଧାନ ବିରୋଧୀ, ଆଇନ ବିରୋଧୀ ବୋଲି ହରିଚନ୍ଦନ କହିଛନ୍ତି ।
ଅପରପକ୍ଷରେ ବିଜେଡିର ସୁଧୀର ସାମଲ କହିଛନ୍ତି, ଆଗରୁ ବେଶି ଲୋକ ଆସୁନଥିଲେ, ଏବେ ଅଧିକ ଲୋକ ଆସୁଛନ୍ତି । ଗହଳି ହେଉଥିବାରୁ ସରକାର ଚିନ୍ତା କରୁଛନ୍ତି କେମିତି ଭକ୍ତ ଶୃଙ୍ଖଳିତ ଦର୍ଶନ କରିବେ । କାଁ ଭାଁ ଅସୁବିଧା ହେବ । ସବୁ ନିଷ୍ପତି ଠିକ ଭାବେ ନିଆଯାଉଛି ।
ସୂଚନାଯ୍ୟୋଯେ ଗତକାଲି ଶ୍ରୀମନ୍ଦିର ଆଗରେ ପ୍ରବଳ ଭିଡ଼ ଯୋଗୁଁ ବହୁ ବୟସାଧିକ ଯାତ୍ରୀ ଅସୁସ୍ଥ ହୋଇପଡିଥିଲେ । ଏହାକୁ ନେଇ ଶ୍ରୀମନ୍ଦିର ମୁଖ୍ୟ ପ୍ରଶାସକ ରଞ୍ଜନ ଦାସ କହିଥିଲେ, ବୟସାଧିକ ଓ ରୋଗାକ୍ରାନ୍ତ ବ୍ୟକ୍ତି ନଆସି ଯେଉଁଠୁ ବି ଦର୍ଶନ କଲେ ଶୁଣିବେ ମହାପ୍ରଭୁ । ଏଭଳି ବ୍ୟକ୍ତିମାନେ ଗହଳି ଭିତରେ ନଆସିବା ପାଇଁ ସେ ଅନୁରୋଧ କରିଥିଲେ ।
