ଭୁବନେଶ୍ୱର, ଜାତୀୟ ରାଜପଥ ଉପରେ ଓଲଟିଲା ବେଆଇନ ଗୋରୁ ବୋଝେଇ ଟ୍ରକ । ମୟୂରଭଞ୍ଜ ଜିଲ୍ଲା ଯଶିପୁର ଥାନା ଅନ୍ତର୍ଗତ 49 ନମ୍ବର ଜାତୀୟ ରାଜପଥ ଟଙ୍ଗାବିଲା ନିକଟରେ ବେଆଇନ ଗୋରୁ ବୋଝେଇ ମିନିଟ୍ରକ ଓଲଟିପଡିଛି । ଏଥିରୁ 8ଟି ବଳଦର ମୃତ୍ୟୁ ହୋଇଥିବା ବେଳେ 10ରୁ ଅଧିକ ଗୋରୁ ଆହତ ହୋଇଛନ୍ତି ।
ସୂଚନାଯୋଗ୍ୟ ଗତକାଲି ବିଳମ୍ବିତ ରାତିରେ ଠାକୁରମୁଣ୍ଡା ଥାନା ପୋଲିସ ଏବଂ କରଞ୍ଜିଆ ଥାନା ପୋଲିସ ଏକ ବେଆଇନ ବଳଦ ବୋଝେଇ ମିନିଟ୍ରକକୁ ପିଛା କରୁଥିବା ବେଳେ ମିନିଟ୍ରକଟି ଦ୍ରୁତଗତିରେ ଠାକୁରମୁଣ୍ଡା, କରଞ୍ଜିଆ ଦେଇ ୪୯ନମ୍ବର ଜାତୀୟ ରାଜପଥରେ କଲିକତା ଅଭିମୁଖେ ଯାଉଥିବା ବେଳେ ଟଙ୍ଗାବିଲା ଓଭରବ୍ରିଜ ନିକଟରେ ଭାରସାମ୍ୟ ହରାଇ ଓଲଟିପଡିଥିଲା । ଫଳରେ ମିନିଟ୍ରକରେ ବେଆଇନ ଭାବେ ଚାଲାଣ ହେଉଥିବା ୨୦ରୁ ଉର୍ଦ୍ଧ୍ୱ ବଳଦଙ୍କ ମଧ୍ୟରୁ ୮ରୁ ଅଧିକ ବଳଦର ମୃତ୍ୟୁ ହୋଇଥିବା ବେଳେ ଅନ୍ୟ ବଳଦ ଗୁରୁତର ଆହତ ହୋଇଥିବା ସୂଚନା ମିଳିଛି । ଗାଡିଟି ଦୁର୍ଘଟଣା ଗ୍ରସ୍ତ ହେବା ପରେ ଘଟଣା ସ୍ଥଳରୁ ଗାଡି ଡ୍ରାଇଭର ଏବଂ ହେଲପର ଫେରାର ହୋଇଯାଇଛନ୍ତି । ଯଶିପୁର ପୋଲିସ ଗାଡିକୁ ଜବତ କରିଛି । ଏହି ଘଟଣାକୁ ନେଇ ଘଟଣା ସ୍ଥଳରେ ଚାପା ଉତେଜନା ଲାଗି ରହିଛି । ପୋଲିସ ତରବରିଆ ଭାବେ ଗାଡି ଏବଂ ବଳଦକୁ ଜେସିବି ସାହାଯ୍ୟରେ ଉଠାଉଥିବା ବେଳେ ସ୍ଥାନୀୟ ଲୋକେ ବିରୋଧ କରିଥିଲେ ।
