ବଲାଙ୍ଗିର,ବଲାଙ୍ଗିର ପାଟଣାଗଡ଼ ସହରରେ ଆଜି ସକାଳେ ଏକ ବଣୁଆ ଦନ୍ତା ହାତୀ ବୁଲୁଥିବା ଦେଖିବାକୁ ମିଳିଛି । ତେବେ ସକାଳୁ ସକାଳୁ ରାସ୍ତାରେ ହାତୀକୁ ଦେଖି ଲୋକମାନେ ଭୟଭିତ ହୋଇପଡିଛନ୍ତି । ଖବର ପାଇ ବନ ବିଭାଗ ଟିମ୍ ଘଟଣାସ୍ଥଳରେ ପହଂଚି ହାତୀ ଘଉଡାଇବାକୁ ଉଦ୍ୟମ ଜାରି ରଖିଛି । ଖାଦ୍ୟ ଅନ୍ବେଷଣରେ ହାତୀଟି ସହରାଭିମୁଖୀ ହୋଇଥିବା ଅନୁମାନ କରାଯାଉଛି ।
ସୂଚନା ଅନୁସାରେ, ଆଜି ସକାଳୁ ପାଟଣାଗଡ଼ ବଥର୍ଲା ଛକ ବ୍ରହ୍ମପୁରା ଭିତର ଦେଇ ବରପଦର ରାସ୍ତାରେ ଏହି ବଣୁଆ ଦନ୍ତା ହାତୀ ବୁଲୁଥିବା ଦେଖିବାକୁ ମିଳିଛି । ସ୍ଥାନୀୟ ଲୋକେ ଭୟଭୀତ ଅବସ୍ଥାରେ ଥିବା ବେଳେ ସକାଳୁ ମର୍ଣ୍ଣିଂ ୱାକ୍ ରେ ଯାଇଥିବା ଲୋକେ ଦନ୍ତା ହାତୀକୁ ସ୍ପଷ୍ଟ ଭାବେ ଦେଖିଥିବା କହିଛନ୍ତି । ଦନ୍ତାହାତୀର ଲମ୍ବା ଲମ୍ବା ଦାନ୍ତ ଦେଖିଲେ ଯେକେହିବି ଭୟଭୀତ ହୋଇପଡ଼ିବେ ବୋଲି ଲୋକେ କୁହାକୁହି ହେଉଛନ୍ତି । ପାଟଣାଗଡ଼ ବନବିଭାଗ କର୍ମଚାରୀ ମଧ୍ୟ ଦନ୍ତା ହାତୀର ଗତିବିଧିକୁ ନିରୀକ୍ଷଣ କରୁଥିବା ଜଣାପଡ଼ିଛି ।
