-
ପ୍ରଦର୍ଶିତ ହେଲା ଦେବୀ ଦୂର୍ଗାଓ ନାରୀ ଶକ୍ତି ଉପରେ ଆଧାରିତ ୫୦ଟି ଚିତ୍ରକଳା
ଭୁବନେଶ୍ବର, ଶାରଦୀୟ ଦୁର୍ଗାପୂଜା ଅବସରରେ ସବୁଠି ଉତ୍ସବ ମୁଖର । ଏହି ଅବସରରେ ଓଡ଼ିଶା ଲଳିତ କଳା ଏକାଡ଼େମୀ, ଓଡିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ଦ୍ଵାରା ନୀଳାଦ୍ରୀ ବିହାର ସ୍ଥିତ ବୁଦ୍ଧ ଆର୍ଟ ଗ୍ୟାଲେରୀ ଠାରେ ଏକ ସମସାମୟିକ ଚିତ୍ରକଳା ପ୍ରଦର୍ଶନୀ ‘ଦେବୀ ‘ ଉଦ୍ଘାଟିତ ହୋଇଯାଇଛି । ପ୍ରଦର୍ଶନୀକୁ ବରିଷ୍ଠ ନାରୀ ଶିଳ୍ପୀ ଜ୍ୟୋତିମୟୀମାହନ୍ତି ,ବରିଷ୍ଠ ଚିତ୍ରଶିଳ୍ପୀ ବିନୋଦ ମହାରଣା, ଏକାଡେମୀର ସଭାପତି ତଥା ଅନ୍ତର୍ଜାତୀୟ ଖ୍ୟାତି ସମ୍ପନ୍ନ ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକ ପ୍ରମୁଖ ପ୍ରଦୀପ ପ୍ରଜ୍ଵଳନ ପୂର୍ବକ ଉଦ୍ଘାଟନ କରିଥିଲେ । ଦଶହରା ଅବସରରେ ଦେବୀ ଦୁର୍ଗା, ନାରୀ ଶକ୍ତି ଏବଂ ନାରୀ ମନସ୍ତତ୍ଵକୁ ନେଇ ପ୍ରଦର୍ଶିତ ଚିତ୍ର ଗୁଡିକ ଦର୍ଶକଙ୍କୁ ପ୍ରଭାବିତ କରିବା ସହିତ ସମାଜକୁ ଏକ ସୁବାର୍ତ୍ତା ଦେଇପାରିବ ବୋଲି ଅତ୍ତିଥି ମାନେ ମତ ପ୍ରକାଶ କରିଥିଲେ । ପ୍ରାରମ୍ଭରେ ଏକାଡ଼େମୀର ସଚିବ ପଞ୍ଚାନନ ସାମଲ ଅତ୍ତିଥି ପରିଚୟ ପୂର୍ବକ ପୁଷ୍ପଗୁଚ୍ଛ ପ୍ରଦାନ କରି ଅତ୍ତିଥିଙ୍କୁ ସ୍ଵାଗତ କରିଥିଲେ । ଉକ୍ତ ପ୍ରଦର୍ଶନୀରେ ଏକାଡେମୀ ଦ୍ଵାରା ସଂରକ୍ଷିତ ଦେବୀ ଦୁର୍ଗା ଓ ନାରୀ ଶକ୍ତି ଉପରେ ଆଧାରିତ ବରିଷ୍ଠ ଓ ଯୁବ ଶିଳ୍ପୀଙ୍କ ୫୦ ଟି ସୃଜନଶୀଳ ଚିତ୍ରକଳା ପ୍ରଦର୍ଶିତ ହୋଇଅଛି । ଏହି ପ୍ରଦର୍ଶନୀ ଅକ୍ଟୋବର ୨୭ ତାରିଖ ପର୍ଯ୍ୟନ୍ତ ପ୍ରତ୍ୟେକ ଦିନ ୧୧ଟା ରୁ ସଂନ୍ଧ୍ୟା ୭ଟା ପର୍ଯ୍ୟନ୍ତ ସାଧାରଣ ଦର୍ଶକ ପାଇଁ ଖୋଲା ରହିବ । ପ୍ରଦର୍ଶନୀ ଅବସରରେ ବରିଷ୍ଠ ଚିତ୍ର ଶିଳ୍ପୀ ଚନ୍ଦ୍ରଶେଖର ମହାରଣା ,ଅଶୋକ ପଟ୍ଟନାୟକ ,ଜୟଶ୍ରୀ ଜେନା, ରବୀନ୍ଦ୍ର କୁମାର ମହାରଣା, ନରୋତ୍ତମ ଦାସ ପ୍ରମୁଖ ଶିଳ୍ପୀ ଓ ଅନେକ କଳା ପ୍ରେମୀ ମାନେ ପ୍ରଦର୍ଶନୀକୁ ବୁଲି ଦେଖିଥିଲେ ।
