ଇସଲାମାବାଦ, ଅଫଗାନିସ୍ତାନର ସୀମାକୁ ଲାଗି ରହିଥିବା ଅଂଚଳର ଅଶାନ୍ତ ଖ୍ୟବର ପଖତୁନଖ୍ଵା ପ୍ରାନ୍ତରେ ସେନା ସହିତ ସଂଘର୍ଷ ବେଳେ ୪ ଜଣ ଆତଙ୍କବାଦୀ ପ୍ରାଣ ହରାଇଛନ୍ତି । ସେନାର ଯବାନ ମାନଙ୍କ ସହିତ ଆତଙ୍କବାଦୀଙ୍କ ଏହି ସଂଘର୍ଷ ଲକ୍କି ମାରବାତ ଜିଲ୍ଲାର ସେମୁ ବାଂଡା ଅଂଚଳରେ ହୋଇଛି । ପାକିସ୍ତାନ ସେନାର ମିଡ଼ିଆ ଶାଖା ଇଂଟର-ସର୍ଭିସେସ୍ ପବ୍ଲିକ ରିଲେସନ୍ସ (ଆଇଏସପିଆର)ସୂତ୍ରରୁ ଏହି ସୂଚନା ସ୍ଥାନୀୟ ଗଣମାଧ୍ୟମ ଦେଇଛି ।
ଆଇଏସପିଆର ଶୁକ୍ରବାର କହିଛି ଯେ, ସେନାର ଗୁଇନ୍ଦା-ଆଧାରିତ ଅପରେସନ୍ ସମୟରେ ଘଟିଥିବା ଏହି ସଂଘର୍ଷରେ ୪ ଜଣ ଆତଙ୍କବାଦୀ ପ୍ରାଣ ହରାଇଛନ୍ତି । ଜଣେ ଆତଙ୍କବାଦୀ ଧରାପଡିଛି । ଧରାପଡିଥିବା ଏହି ଆତଙ୍କବାଦୀ ଗୁଳି ବିନିମୟ ବେଳେ ଆହତ ହୋଇଛି । ସେମାନଙ୍କ ନିକଟରୁ ଅସ୍ତ୍ରଶସ୍ତ୍ର, ଉପକରଣ ଏବଂ ବିସ୍ଫୋଟକ ସାମଗ୍ରୀ ଜବତ ହୋଇଛି ।
