![](https://indokalingtimes.com/wp-content/uploads/2021/07/IKT-NEWS-1.jpg)
ଧର୍ମଶାଳା, ଆଜି ହେଉଛି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ୭୮ତମ ଜନ୍ମ ଦିବସ । ଏହି ଅବସରରେ ଯାଜପୁର ଜିଲା ଧର୍ମଶାଳା ବ୍ଲକରେ ବିଜୁ ଯୁବ ଜନତା ଦଳ ପକ୍ଷରୁ ବିଭିନ୍ନ କାର୍ଯ୍ୟକ୍ରମ ହାତକୁ ନେଇଛି । ଯୁବ ନେତା କ୍ଷିତିଶ ନାୟକଙ୍କ ନେତୃତ୍ୱରେ ସକାଳେ ଜାରକାସ୍ଥିତ ଗୋକର୍ଣ୍ଣେଶ୍ୱର ଶୈବପୀଠରେ ପୂଜାର୍ଚ୍ଚନା କରାଯିବା ସହିତ ୧୦୮ ସମୂହ ପ୍ରଦୀପ ପଜ୍ଜ୍ୱଳନ କରାଯାଇଥିଲା । ପରେ ୧୦ଟା ସମୟରେ ଧର୍ମଶାଳା ବ୍ଲକ ମର୍ଜିତାପୁର କଲ୍ୟାଣ ମଣ୍ଡପରେ ଏକ ମାଗଣା ସ୍ୱାସ୍ଥ୍ୟ ଶିବିର ଅନୁଷ୍ଠିତ ହୋଇଯାଇଛି । ୧୧ ନଂ ଜେନା ଜିଲାପରିଷଦ ସଭ୍ୟ ସୁଧାଂଶୁ ଶେଖର ସାହୁ ରିବନ କାଟି କାର୍ଯ୍ୟକ୍ରମକୁ ଉଦଘାଟନ କରିଥିଲେ । କାର୍ଯ୍ୟକ୍ରମରେ ଭେଷଜ,ହୃଦରୋଗ,ସ୍ତ୍ରୀ ରୋଗ,ଶିଶୁ,ଚକ୍ଷୁ,ଚର୍ମ, ଆର୍ଥୋପେଡିକ,ଡାଇବେଟିସ ବିଭାଗର ବରିଷ୍ଠ ଡାକ୍ତର ଯୋଗ ଦେଇ ରୋଗୀଙ୍କ ସ୍ୱାସ୍ଥ୍ୟ ପରୀକ୍ଷା ନୀରିକ୍ଷା କରିଥିଲେ । ଏବଂ ରୋଗୀମାନଙ୍କ ଔଷଧ ସେବନ କରିବାକୁ ପରାମର୍ଶ ଦେବା ସହିତ ଅନୁଷ୍ଠାନ ପକ୍ଷରୁ ମାଗଣାରେ ଔଷଧ ବଂଟନ କରାଯାଇଥିଲା । ଏହି ସ୍ୱାସ୍ଥ୍ୟ ଶିବିରରେ ଧର୍ମଶାଳା ବିଧାୟକ ପ୍ରଣବ କୁମାର ବଳବନ୍ତରାୟ,ବରିଷ୍ଠ ନେତା ଜଳଧର ମହାନ୍ତି,ମହିଳା ନେତ୍ରୀ ବିଶ୍ୱବନ୍ଦନା ଜେନା ପ୍ରମୁଖ ଯୋଗ ଦେଇ କର୍ମକର୍ତା ଓ ରୋଗୀମାନଙ୍କୁ ଉତ୍ସାହିତ କରିଥିଲେ । ଧର୍ମଶାଳା ବିଜୁ ଯୁବ ଜନତାର ସମସ୍ତ ସଭ୍ୟ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ ।