ଗଞ୍ଜାମ , ବିନା ଛୁଟି ଦରଖାସ୍ତରେ ବିଦ୍ୟାଳୟରେ ଅନୁପସ୍ଥିତ ଥିବା ଜଗନ୍ନାଥ ପ୍ରସାଦ ବ୍ଲକ ଭାବସର ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷୟତ୍ରୀ ସବିତା ସାହୁଙ୍କୁ ବ୍ଲକ ଶିକ୍ଷା ଅଧିକାରୀ (ବିଇଓ) ସୁଶ୍ରୀ କଲ୍ୟାଣୀ ପାଢୀ କେଫିୟତ ତଲବ କରିଛନ୍ତି ।
କିଛି ପ୍ରଧାନ ଶିକ୍ଷକ ଓ ଶିକ୍ଷୟତ୍ରୀ ବିନା ଦରଖାସ୍ତରେ ବିଦ୍ୟାଳୟରେ ଅନୁପସ୍ଥିତ ରହୁଥିବା ନେଇ କିଛି ଅବିଭାବକ ବିଇଓଙ୍କୁ ମୌଖିକ ଭାବେ ଅଭିଯୋଗ କରିଥିଲେ । ଏହାକୁ ଆଧାର କରି ଗତ ୭ ତାରିଖରେ ବିଦ୍ୟାଳୟ ପରିଦର୍ଶନ ପାଇଁ ସିଆରସିସିଙ୍କୁ ବିଇଓ ନିର୍ଦ୍ଦେଶ ଦେବା ସହ ଅନୁପସ୍ଥିତ ଥିବା ପ୍ରଧାନଶିକ୍ଷକ ଓ ଶିକ୍ଷୟତ୍ରୀଙ୍କ ତାଲିକା ପ୍ରସ୍ତୁତ କରିବାକୁ କହିଥିଲେ । ଏହି ସମୟରେ ଭାବସର କ୍ଲଷ୍ଟର ସିଆରସିସି ସଞ୍ଜୟ କୁମାର ଜେନା ଭାବସର ଉଚ୍ଚ ପ୍ରାଥମିକ ବିଦ୍ୟାଳୟକୁ ଯାଇଥିବା ବେଳେ ପ୍ରଧାନ ଶିକ୍ଷୟତ୍ରୀ ଅନୁପସ୍ଥିତ ଥିଲେ ।
