ରାୟଗଡ଼ା- ରାୟଗଡ଼ା ଜିଲ୍ଲା ଚନ୍ଦ୍ରପୁର ଥାନା ଅନ୍ତର୍ଗତ ଚିଚିପଙ୍ଗା ଗାଁ ନିକଟସ୍ଥ ଜଙ୍ଗଲରୁ ଜଣେ ନିଖୋଜ ନାବାଳିକାର ଅର୍ଦ୍ଧନଗ୍ନ ମୃତଦେହ ଉଦ୍ଧାର ହୋଇଛି । ତାଙ୍କୁ ଦୁଷ୍କର୍ମ ପରେ ପ୍ରମାଣ ନଷ୍ଟ ଉଦ୍ଦେଶ୍ୟରେ ହତ୍ୟା କରାଯାଇଥିବା ସନ୍ଦେହ କରାଯାଉଛି । ମୃତ ନାବାଳିକାଙ୍କ ଘର ଚନ୍ଦ୍ରପୁର ଗ୍ରାମରେ ବୋଲି ଜଣାପଡିଛି ।
ସୂଚନାଯୋଗ୍ୟ, ଗତ ୨୧ ତାରିଖ (ଶନିବାର) ଠାରୁ ସେ ନିଖୋଜ ଥିଲେ । ଗତ ରବିବାର ଦିନ ପରିବାର ଲୋକେ ଝିଅ ନିଖୋଜ ଥିବା ସମ୍ପର୍କରେ ଥାନାରେ ଏତଲା କରିଥିଲେ । ହେଲେ ପୋଲିସ ଘଟଣାରେ କୌଣସି ପଦକ୍ଷେପ ନେଇନଥିବାରୁ ଆଜି ଚନ୍ଦ୍ରପୁରରେ ଉତେଜନା ଦେଖାଦେଇଥିଲା । ଗ୍ରାମବାସୀ ସ୍ଥାନୀୟ ଆଦର୍ଶ ବିଦ୍ୟାଳୟ ନିକଟରେ ରାସ୍ତାରୋକ କରିଥିଲେ । ଏଥି ସହ ଚନ୍ଦ୍ରପୁର ଥାନା ଘେରାଉ କରିଥିଲେ । ରାୟଗଡ଼ାରୁ ସାଇଂଟିଫିକ୍ ଟିମ୍ ଓ ସନ୍ଧାନୀ କୁକୁର ପହଂଚି ଜଙ୍ଗଲ ନିକଟରେ ଖୋଜାଖୋଜି କରିବା ସମୟରେ ନାବାଳିକାଙ୍କ ମୃତଦେହ ଠାବ କରାଯାଇଥିଲା । ତେବେ ତାଙ୍କୁ ଦୁଷ୍କର୍ମ ପରେ ହତ୍ୟା କରାଯାଇଥିବା ପୋଲିସ ଅନୁମାନ କରୁଛି । ପୋଲିସ ପକ୍ଷରୁ ଏନେଇ ଅଧିକ ତଦନ୍ତ ଜାରୀ ରହିଛି ।
