ବରଗଡ଼- ବରଗଡ଼ ଜିଲ୍ଲା ପାଇକମାଳ ଥାନା ଅନ୍ତର୍ଗତ ଟେମ୍ରିପାଲ ଗାଁ ନିକଟସ୍ଥ ଗନ୍ଧମାର୍ଦ୍ଦନ ଜଙ୍ଗଲରୁ ଜଣେ ଯୁବତୀଙ୍କ କ୍ଷତବିକ୍ଷତ ମୃତଦେହ ଉଦ୍ଧାର ହୋଇଛି । ତାଙ୍କ ନାମ ଲୁଭାବତୀ ଏଣ୍ଡଜା । ତାଙ୍କ ଘର ଟେମ୍ରିପାଲ ଗାଁରେ ବୋଲି ଜଣାପଡିଛି ।
ଗତ ଶୁକ୍ରବାର ସଂନ୍ଧ୍ୟାରେ ଲୁଭାବତୀ ଶୌଚ ପାଇଁ ଯାଇଥିଲେ । ହେଲେ ଆଉ ଘରକୁ ଫେରିନଥିଲେ । ପରିବାର ଲୋକେ ତାଙ୍କୁ ଚାରିଆଡ଼େ ଖୋଜାଖୋଜି କରିଥିଲେ ସୁଦ୍ଧା ତାଙ୍କର କୌଣସି ସନ୍ଧାନ ପାଇନଥିଲେ । ଏନେଇ ପରିବାର ପକ୍ଷରୁ ଗତ ସୋମବାର ଦିନ ଥାନାରେ ଝିଅ ନିଖୋଜ ସମ୍ପର୍କରେ ଏତଲା ହୋଇଥିଲା । ଆଜି ସକାଳେ ଲୁଭାବତୀଙ୍କ ମୃତଦେହ ରାସ୍ତା କଡ଼ରେ ପଡିଥିବା ଗ୍ରାମର କେତେକ ଲୋକେ ଦେଖିବାକୁ ପାଇଥିଲେ । ସେମାନେ ଏନେଇ ଯୁବତୀଙ୍କ ପରିବାର ଲୋକ ଓ ସ୍ଥାନୀୟ ପୋଲିସକୁ ଖବର ଦେଇଥିଲେ । ପାଇକମାଳ ପୋଲିସ ଘଟଣାସ୍ଥଳରେ ପହଂଚି ମୃତଦେହକୁ ଉଦ୍ଧାର କରିବା ସହ ଏନେଇ ଅଧିକ ତଦନ୍ତ ଚଳାଇଛି । କିପରି ଓ କେଉଁ ପରିସ୍ଥିତିରେ ତାଙ୍କର ମୃତ୍ୟୁ ଘଟିଲା କିମ୍ବା କେହି ତାଙ୍କୁ ହତ୍ୟା କରିଛି ପୋଲିସ ସେନେଇ ଛାନଭିନ୍ ଜାରୀ ରଖିଛି ।
