ବଲାଙ୍ଗିର- ବିଶାଖାପାଟଣାରୁ ରାୟପୁର ଅଭିମୁଖେ ଯାଉଥିବା ଏକ କୋଇଲା ବୋଝେଇ ଟ୍ରେନ୍ ରେ ଘଟିଛି ଅଗ୍ନିକାଣ୍ଡ । ଗତକାଲି ରାତି ପ୍ରାୟ ୧୦ଟା ସମୟରେ ଟ୍ରେନ୍ ଟି ମୁରିବାହାଲ ଷ୍ଟେସନରେ ପହଂଚିବା ପରେ କେତେକ ବଗିରୁ ଧୂଆଁ ବାହାରୁ ଥିବା ଜଣାପଡିଥିଲା । ଏହାପରେ ଟ୍ରେନ ଟି କଂଟାବାଞ୍ଜି ଷ୍ଟେସନରେ ପହଂଚିବା ପରେ ରେଳବାଇ କର୍ତୃପକ୍ଷ ଏ ସମ୍ପର୍କରେ କଂଟାବାଞ୍ଜି ଅଗ୍ନିଶମ ବିଭାଗକୁ ଖବର ଦେଇଥିଲେ । ଅଗ୍ନିଶମ କର୍ମଚାରୀ ତୁରନ୍ତ ରେଲୱେ ଷ୍ଟେସନରେ ପହଂଚି ପ୍ରାୟ ୬ ଘଂଟାର ଅକ୍ଳାନ୍ତ ପରିଶ୍ରମ ପରେ ଆଜି ଭୋର୍ ପ୍ରାୟ ୪ଟା ସମୟରେ ନିଆଁକୁ ଆୟତ କରିଥିଲେ । ଟ୍ରେନ୍ ର ୨୧ଟି ବଗିରେ ଏହି ନିଆଁ ଲାଗିଥିଲା । ନିଆଁ ଲିଭାଯିବା ପରେ ଟ୍ରେନ୍ ଟି ଏହାର ଗନ୍ତବ୍ୟସ୍ଥଳ ରାୟପୁର ଅଭିମୁଖେ ଯାତ୍ରା କରିଛି । ଏହି ଅଗ୍ନିକାଣ୍ଡରେ ଲକ୍ଷାଧିକ ଟଙ୍କାର କ୍ଷତି ଘଟିଛି, ହେଲେ ନିଆଁ ଲାଗିବାର କାରଣ ଅଦ୍ୟାବଧି ସ୍ପଷ୍ଟ ହୋଇନାହିଁ । ରେଳବାଇ କର୍ତୃପକ୍ଷ ଘଟଣାର ତଦନ୍ତ ଆରମ୍ଭ କରିଛନ୍ତି ।
