ଶିମଲା,ହିମାଚଳ ପ୍ରଦେଶର ଶିମଲାରେ ଖାଇକୁ ଖସିଲା ଟିପ୍ପର । ରୋହଡୁ ଉପକଣ୍ଡ ଚିଡଗାଓଁରେ ଏଭଳି ଘଟଣା ଘଟିଛି । ଟିପ୍ପରଟି ଖାଇକୁ ଖସିପଡିବା କାରଣରୁ ତିନି ଜଣଙ୍କର ମୃତ୍ୟୁ ହୋଇଛି । ସେହିପରି 5ଜଣ ଆହତ ହୋଇଛନ୍ତି । ସମସ୍ତ ମୃତାହତ ନେପାଳର ମୂଳ ବାସିନ୍ଦା ହୋଇଥିବା ବେଳେ ଏଠାରେ ଶ୍ରମିକ ଭାବେ କାମ କରୁଥିଲେ ।
ସୂଚନା ମୁତାବକ, ଲୋକନିର୍ମାଣ ବିଭାଗର ଠିକାଦାର ନିକଟରେ କାମ କରୁଥିବା ଏହି ନେପାଳୀ ଶ୍ରମିକ କାମ ସାରିବା ପରେ ନିଜ ନିଜ ଘରକୁ ଫେରୁଥିଲେ । ଖଶଧାର ନିକଟରେ ତାଙ୍କ ଗାଡିଟି ଭାରସାମ୍ୟ ହରାଇ ଖାଇକୁ ଖସିପଡିଥିଲା । ଦୁର୍ଘଟଣା ପରେ ଘଟଣାସ୍ଥଳରେ ଆର୍ତ୍ତନାଦ ଶୁଭିଥିଲା । ସ୍ଥାନୀୟ ଲୋକେ ଏନେଇ ପୋଲିସକୁ ଖବର ଦେଇଥିଲେ । ପୋଲିସ ସ୍ଥାନୀୟ ଲୋକଙ୍କ ସହାୟତାରେ ସମସ୍ତଙ୍କୁ ଖାଇ ଭିତରୁ ଉଦ୍ଧାର କରିଥିଲା । ସମସ୍ତ ଆହତଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । ଦୁର୍ଘଟଣାରେ 3ଜଣଙ୍କର ମୃତ୍ୟୁ ହୋଇଥିବା ବେଳେ 5ଜଣ ଆହତ ହୋଇଛନ୍ତି । ମୃତକ ହେଲେ ଜୟ ବାହାଦୁର, ଦିଲ ବାହାଦୁର ଓ ଡ୍ରାଇଭର ଦିନେଶ ବାହାଦୂର । ଜୟ ବାହାଦୂର ଓ ଦିଲ ବାହାଦୂରଙ୍କ ମୃତ୍ୟୁ ହସ୍ପିଟାଲ ନେବା ରାସ୍ତାରେ ହୋଇଥିବା ବେଳେ ହସ୍ପିଟାଲରେ ଡ୍ରାଇଭରର ମୃତ୍ୟୁ ହୋଇଥିଲା ।
ଆହତଙ୍କୁ ଚିକିତ୍ସା ପାଇଁ ସିଭିଲ ହସ୍ପିଟାଲ ରୋହଡୁରେ ଭର୍ତ୍ତି କରାଯାଇଛି । ସମସ୍ତ ଶ୍ରମିକ ଚିଡଗାଓଁରେ ରାସ୍ତା ନିର୍ମାଣରେ ନିୟୋଜିତ ଥିଲେ ।
