ବଲାଙ୍ଗିର ,ଗତକାଲି ବଲାଙ୍ଗିର ଜିଲ୍ଲାର ଆଗଲପୁର ବ୍ଲକସ୍ତରୀୟ ପବିତ୍ର ଗୁରୁଦିବସ କାର୍ଯ୍ୟକ୍ରମ ସରକାରୀ ପଞ୍ଚାୟତ ଉଚ୍ଚ ବିଦ୍ୟାଳୟ ,ରୋତ ଠାରେ ଅନୁଷ୍ଠିତ ହୋଇଯାଇଛି। ବ୍ଲକ୍ ଶିକ୍ଷାଧିକାରୀ ଦିଲିପ କୁମାର ପାଠୀଙ୍କ ସଭାପତିତ୍ଵରେ ଅନୁଷ୍ଠିତ ଏହି କାର୍ଯ୍ୟକ୍ରମ ରେ ମୁଖ୍ୟ ଅତିଥି ଭାବେ ମାନ୍ୟବର ବିଧାୟକ ଲୋଇସିଂହା ଡ ମୁକେଶ କୁମାର ମହାଲିଙ୍ଗ, ମୁଖ୍ୟବକ୍ତା ଭାବେ ବ୍ଲକ ଅଧ୍ୟକ୍ଷା ଗୀତାଞ୍ଜଳି ଦାଶ, ସମ୍ମାନିତ ଅତିଥି ଭାବେ ଅତିରିକ୍ତ ବ୍ଲକ ଶିକ୍ଷାଧିକାରୀ ରଜନୀକାନ୍ତ ସାହୁ, ସ୍ଥାନୀୟ ଉଚ୍ଚ ବିଦ୍ୟାଳୟର ପ୍ରଧାନଶିକ୍ଷୟିତ୍ରୀ ମମତା ସେଠୀ, ବିଦ୍ୟାଳୟ କମିଟିର ସଚ୍ଚିକାନ୍ତ ପଟେଲ ଓ ସ୍ଥାନୀୟ ସରପଞ୍ଚ ଯୋଗଦେଇଥିଲେ ।
ଦୀପ ପ୍ରଜ୍ଜ୍ଵଳନ ପରେ ସର୍ବପ୍ରଥମେ ଭାରତରତ୍ନ ଡ.ସର୍ବପଲ୍ଲୀ ରାଧାକୃଷ୍ଣନ ଫଟୋଚିତ୍ରରେ ମାଲ୍ୟାର୍ପଣ କରାଯାଇଥିଲା। ତତ୍ପରେ ଛାତ୍ରୀମାନେ ସ୍ଵାଗତ ସଙ୍ଗୀତ ଗାନ କରିଥିଲେ । ଅତିଥି ମାନେ ଗୁରୁଦିବସର ମହତ୍ତ୍ଵ ଉପରେ ବକ୍ତବ୍ୟ ପ୍ରଦାନ କରିଥିଲେ । ଏହି ଅବସରରେ ଆଗଲପୁର ବ୍ଲକର ଶ୍ରେଷ୍ଠ/ଆଦର୍ଶ ଶିକ୍ଷକ ଭାବେ ପ୍ରାଥମିକ/ଉଚ୍ଚ ପ୍ରାଥମିକସ୍ତରରେ ଡୁଙ୍ଗୁରିପାଲି ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟର ଶିକ୍ଷକ ଯୋଗୀନ୍ଦ୍ର ଦାଶ ଓ ହାଇସ୍କୁଲସ୍ତରରେ ପଞ୍ଚାୟତ ଉଚ୍ଚବିଦ୍ୟାଳୟ ରୋତ ର ଶିକ୍ଷକ ଉମାକାନ୍ତ ପୁଟେଲଙ୍କୁ ମୁଖ୍ୟ ଅତିଥି ବିଧାୟକ ଲୋଇସିଂହା ମାନପତ୍ର ଓ ଉପଢ଼ୌକନ ପ୍ରଦାନ କରି ସମ୍ମାନିତ କରିଥିଲେ । ଶେଷରେ ଆଞ୍ଚଳିକ ସାଧନକର୍ମୀ ସୁମନ୍ତ ସୁନା ଧନ୍ୟବାଦ ଅର୍ପଣ କରିଥିଲେ ।
