ରାଜୌରୀ, ରାଜୌରୀ ଜିଲ୍ଲାର ବୁଦୁଲ ଅଂଚଳର ଗୁନ୍ଧା-ଖବାସ ଗ୍ରାମରେ ଶନିବାର ରାତିତମାମ ସୁରକ୍ଷାବଳ ଏବଂ ଆତଙ୍କବାଦୀଙ୍କ ମଧ୍ୟରେ ସଂଘର୍ଷ ଜାରି ରହିଥିଲା । ରବିବାର ସେଠାରେ ସର୍ଚ୍ଚ ଅପରେସନ ଜାରୀ ରହିଥିବାରୁ ପୋଲିସ ଲୋକମାନଙ୍କୁ ଘଟଣାସ୍ଥଳ ଠାରୁ ୨ କି.ମି. ଦୂରରେ ରହିବାକୁ ପରାମର୍ଶ ଦେଇଥିଲା ।
ସେନାର ପିଆରଓ ଲେଫ୍ଟନେଂଟ କର୍ଣ୍ଣଲ ସୁନିଲ ବର୍ତବାଲ କହିଛନ୍ତି ଯେ, ୨ରୁ ୩ ଜଣ ଆତଙ୍କବାଦୀ ଗ୍ରାମରେ ଲୁଚିଥିବା ଅନୁମାନ କରାଯାଉଛି । ଏବଂ ସେମାନେ ରାତିତମାମ ସୁରକ୍ଷାବଳ ଦ୍ୱାରା ସେଠାରେ କରାଯାଇଥିବା ଘେରାବନ୍ଦୀ ଭାଙ୍ଗି ଚାଲିଯିବାକୁ ପ୍ରଚେଷ୍ଟା କରିଥିଲେ । ହେଲେ ଯବାନ ମାନେ ସେମାନଙ୍କର ଏହି ଉଦ୍ୟମକୁ ପଣ୍ଡ କରିଛନ୍ତି । ଶନିବାର ବୁଦୁଲ ଅଂଚଳର ଗୁନ୍ଧା-ଖବାସ ଗ୍ରାମରେ ପୋଲିସ ଓ ସେନାର ଘେରାବନ୍ଦୀ ଏବଂ ତଲାସୀ ଅଭିଯାନ ସମୟରେ ଏକ ଆତଙ୍କବାଦୀ ନିହତ ହୋଇଛି । ଅଧିକାରୀ ଜଣକ କହିଛନ୍ତି ଯେ, ଆତଙ୍କବାଦୀମାନେ ଯେପରି ଖସିନପଳାନ୍ତି ସେଥିପାଇଁ ସମସ୍ତ ରାସ୍ତାକୁ ସିଲ୍ କରିଛି ସୁରକ୍ଷା ବଳ । ଏବଂ ତଲାସୀ ଅଭିଯାନ ଜାରୀ ରହିଛି ।
