ଭୁବନେଶ୍ୱର, ପ୍ରଦେଶ ଛାତ୍ର କଂଗ୍ରେସ ପକ୍ଷରୁ ଶନିବାର ପ୍ରଦେଶ କଂଗ୍ରେସ କାର୍ଯ୍ୟାଳୟରେ ପୂର୍ବତନ ପ୍ରଦେଶ ଯୁବ କଂଗ୍ରେସ ସଭାପତି ତଥା ପୂର୍ବତନ ପ୍ରଦେଶ କଂଗ୍ରେସ କମିଟିର ସାଧାରଣ ସଂପାଦକ ସ୍ୱର୍ଗତ ସଂଗ୍ରାମ କେଶରୀ ଜେନାଙ୍କ ଜନ୍ମ ବାର୍ଷିକ ପାଳିତ ହୋଇଯାଇଛି । ଏହି ଅବସରରେ ପୂର୍ବାହ୍ନରେ କଂଗ୍ରେସ ଭବନ ପରିବସରରେ ଏକ ରକ୍ତଦାନ ଶିବିର କାର୍ଯ୍ୟକ୍ରମ ଆୟୋଜନ ହୋଇଥିଲା । ପ୍ରଥମେ ଶ୍ରୀ ପଟ୍ଟନାୟକ ଏବଂ ଅନ୍ୟାନ୍ୟ ନେତୃବର୍ଗ ସ୍ୱଗର୍ତ ସଂଗ୍ରାମ ଜେନାଙ୍କ ଫଟୋ ଚିତ୍ରରେ ପୁଷ୍ପମାଲ୍ୟ ଅର୍ପଣ କରିଥିଲେ ଏବଂ ପ୍ରଦୀପ ପ୍ରଜ୍ୱଳନ କରିଥିଲେ । ଏହି ରକ୍ତଦାନ ଶିିବିରକୁ ଉଦ୍ଘାଟନ କରି ପୂର୍ବତନ ପିସିସି ସଭାପତି ନିରଞ୍ଜନ ପଟ୍ଟନାୟକ କହିଥିଲେ ଯେ, ସଂଗ୍ରାମ ଥିଲେ କଂଗ୍ରେସ ଦଳର ଅମୂଲ୍ୟ ସମ୍ପତି । ସାରା ରାଜ୍ୟରେ ଛାତ୍ର ଓ ଯୁବକ ମାନଙ୍କୁ ସେ ସଂଗଠିତ କରୁଥିଲେ । ପ୍ରଦେଶ ଯୁବ କଂଗ୍ରେସର ସଭାପତି ଥିଲାବେଳେ ବିଭିନ୍ନ ଜିଲ୍ଲା ଗ୍ରସ୍ତ କରି ତୃଣମୂଳ ସ୍ତରରୁ ଯୁବ କଂଗ୍ରେସର ସଂଗଠନ ଦୃଢ଼ିଭୂତ କରିଥିଲେ । ଛାତ୍ର ସଂସଦ ନିର୍ବାଚନମାନଙ୍କରେ ସେ ବିଭିନ୍ନ ଜିଲ୍ଲାର ମହାବିଦ୍ୟାଳୟ, ବିଶ୍ୱ ବିଦ୍ୟାଳୟରେ ଛାତ୍ର କଂଗ୍ରେସ ପ୍ରାର୍ଥୀମାନେ ଯେଭଳି ଅଧିକରୁ ଅଧିକ ସଂଖ୍ୟାରେ ବିଜୟୀ ହେବେ ତା’ର ପ୍ରତ୍ୟେକ୍ଷ ତତ୍ୱବଧାନ ନେଉଥିଲେ । ଅନ୍ୟପକ୍ଷରେ ସେ ଥିଲେ ଜଣେ ଦରଦୀ ମଣିଷ । ଦୁଃଖି, ରଙ୍କୀ ଓ ନିଃସ୍ୱ ଲୋକମାନଙ୍କୁ ମୁକ୍ତହସ୍ତରେ ସାହାଯ୍ୟ କରୁଥିଲେ । ପୂର୍ବତନ ପିସିସି ସଭାପତି ପ୍ରସାଦ ହରିଚନ୍ଦନ ଏହି କାର୍ଯ୍ୟକ୍ରମରେ ଯୋଗ ଦେଇ କହିଥିଲେ ଯେ, ସଂଗ୍ରାମ ତାଙ୍କର ସ୍ୱଳ୍ପ ଜୀବନ କାଳ ମଧ୍ୟରେ ଯେଉଁ କାର୍ଯ୍ୟ କରିଯାଇଛନ୍ତି ତାହା ଛାତ୍ର ଓ ଯୁବକମାନଙ୍କ ପାଇଁ ପ୍ରେରଣା ଦାୟୀ ।
ଏହି କାର୍ଯ୍ୟକ୍ରମରେ ପୂର୍ବତନ ପିସିସି ସଭାପତି ଜୟଦେବ ଜେନା, ବିଧାୟକ ସୁରେଶ କୁମାର ରାଉତରାୟ, ତାରାପ୍ରସାଦ ବାହିନିପତି, ଶିବାନନ୍ଦ ରାୟ, ପଂଚାନନ କାନୁନ୍ଗୋ, ମାନସ ଚୌଧୁରୀ, ରଜତ ଚୌଧୁରୀ, ସମୀର ରାଉତରାୟ, ଲଲାଟେନ୍ଦୁ ମହାପାତ୍ର, ୟାସିର ନୱାଜ, କିଶୋର ଜେନା ପ୍ରମୁଖ ଅଂଶ ଗ୍ରହଣ କରିଥିଲେ । ଏହି ସମସ୍ତ କାର୍ଯ୍ୟକ୍ରମକୁ ରଣିଜିତ୍ ପାତ୍ର ପରିଚାଳନା କରିଥିଲେ । ସଂଗ୍ରାମ କେଶରୀ ଜେନାଙ୍କର କନ୍ୟା ଦ୍ୱୟ ସୋହାନୀ ଓ ଜାହାନୀ ଏହି କାର୍ଯ୍ୟକ୍ରମରେ ଉପସ୍ଥିତ ଥିଲେ ।
