ପୁରୀ, ଶ୍ରାବଣ ଅମାବାସ୍ୟା ତିଥି ଅବସରରେ ଆଜି ଶ୍ରୀମନ୍ଦିରରେ ଶ୍ରୀଜୀଉମାନଙ୍କୁ ଚିତାଲାଗି କରାଯିବ । ଚିତା ଲାଗି ଶ୍ରୀଜୀଉଙ୍କ ଗୁପ୍ତ ସେବା ହୋଇଥିବାରୁ ଏହି ନୀତି ସମୟରେ ଭକ୍ତ ଦର୍ଶନ ବନ୍ଦ ରହିବ । ଆଜି ଅପରାହ୍ନ ୨ଟା ଠାରୁ ସଂନ୍ଧ୍ୟା ୬ଟା ପର୍ଯ୍ୟନ୍ତ ଭକ୍ତ ଦର୍ଶନ ବନ୍ଦ ରହିବ । ଭୋଗମଣ୍ଡପ ପରେ ପତିମହାପାତ୍ର ତିନି ଠାକୁରଙ୍କ ଚିତାକୁ ସଂସ୍କାର କରିବେ । ପରେ ତିନି ବାଡର ବାଡଗ୍ରାହୀ ଦଇତାପତି ଏହି ଚିତା ଗୁଡିକୁ ଶ୍ରୀଜୀଉଙ୍କ ଲଲାଟରେ ଲାଗି କରିବେ । ଶ୍ରୀ ଜଗନ୍ନାଥଙ୍କୁ ବ୍ରହ୍ମଜ୍ୟୋତି ହୀରାଖଚିତ ଧଳାଚିତା, ଶ୍ରୀବଳଭଦ୍ରଙ୍କୁ ନୀଳାଖଚିତ ନୀଳ ଚିତା ଓ ମା ସୁଭଦ୍ରାଙ୍କୁ ମାଣିକ୍ୟଖଚିତ ନାଲିଚିତା ଲାଗି କରାଯିବ । ସ୍ନାନପୂର୍ଣ୍ଣମୀ ଦିନ ପହଣ୍ଡି ହେବା ପୂର୍ବରୁ ଶ୍ରୀଜୀଉଙ୍କ ମସ୍ତକରୁ ଚିତା ଗୁଡିକ ଉଲାଗି କରାଯାଇ ରତ୍ନ ଭଣ୍ଡାରରେ ରଖାଯାଇଥିଲା ଆଜି ଏହି ଏହି ଚିତା ଗୁଡିକୁ ପୁଣି ଥରେ ଶ୍ରୀବିଗ୍ରହମାନଙ୍କୁ ଲାଗି କରାଯିବ ।
ଚିତାଲାଗି ଗୁପ୍ତ ସେବା ହୋଇଥିବାରୁ ଏହି ନୀତି ସମୟରେ ଜୟ ବିଜୟ ଦ୍ଵାର ବନ୍ଦ କରାଯାଇ ନୀତି ପାଳନ କରାଯିବ । ରତ୍ନ ସିଂହାସନ ଉପରେ ଥିବା ଶ୍ରୀଦେବୀ, ଭୂଦେବୀଙ୍କୁ ସିଂହାସନରୁ ସେବକ ମାନେ ଆଣି ଖଟ ଶେଜ ଘରେ ବିଜେ କରାଇବେ । ଚିତା ଲାଗି ପରେ ଶ୍ରୀବିଗ୍ରହଙ୍କ ମହାସ୍ନାନ କରାଯିବ ଏବଂ ଏହାପରେ ଭକ୍ତ ଦର୍ଶନ ଆରମ୍ଭ ହେବ । ଏହି ଗୁପ୍ତ ନୀତି ଅପରାହ୍ନ ୨ଟାରୁ ଆରମ୍ଭ ହୋଇଛି । ଏହି ନୀତି ସମାପନ ନିମନ୍ତେ ୪ ଘଂଟା ସମୟ ଲାଗିବ । ଶ୍ରୀଜୀଉଙ୍କ ଏହି ଗୁପ୍ତ ନୀତି ପାଇଁ ଭକ୍ତ ଦର୍ଶନ ୪ ଘଂଟା ବନ୍ଦ ରହିବ ।
ଏହା ସହ ମହାପ୍ରଭୁ ଅମାବାସ୍ୟା ତିଥିରେ ସାଗର ବିଜେ କରିଥାନ୍ତି । ଏହି ଦିନ ସମୁଦ୍ରମନ୍ଥନରୁ ଚିତା ମିଳିଥିବା କଥିତ ଅଛି । ଏହି ବେଶ ଦର୍ଶନ କଲେ ଭକ୍ତ ଅନେକ ପୂଣ୍ୟଫଳ ପାଇଥାଏ ।
Posted by: Desk, Indo Kaling Times
