ଗଞ୍ଜାମ- ଗଞ୍ଜାମ ଜିଲ୍ଲା ଜଗନ୍ନାଥପ୍ରସାଦ ଥାନା ଅନ୍ତର୍ଗତ ଅଲାଡ଼ି ଗ୍ରାମପଂଚାୟତର ବାଦପଡ଼ା ଗ୍ରାମ ନିକଟସ୍ଥ ଚାଷ ଜମିରୁ ଏକ ନବଜାତ ଶିଶୁକନ୍ୟାକୁ ଉଦ୍ଧାର କରାଯାଇଛି । ଆଜି ସକାଳେ ଜଣେ ମହିଳା ସେହିବାଟ ଦେଇ ଯାଉଥିବା ବେଳେ ଶିଶୁକନ୍ୟାର ବୁକୁଫଟା କାନ୍ଦ ଶୁଣିବାକୁ ପାଇଥିଲେ । ସେ ଏ ସମ୍ପର୍କରେ ଗ୍ରାମବାସୀଙ୍କୁ ଖବର ଦେଇଥିଲେ । ସ୍ଥାନୀୟ ସରପଂଚ, ଅଙ୍ଗନବାଡ଼ି କର୍ମୀ ଓ ଆଶାକର୍ମୀଙ୍କ ଉପସ୍ଥିତିରେ ପ୍ରଥମେ ଶିଶୁକନ୍ୟାଟିକୁ ସେଠାରୁ ଉଦ୍ଧାର କରାଯାଇଥିଲା । ପରେ ଚିକିତ୍ସା ନିମନ୍ତେ ଜଗନ୍ନାଥପ୍ରସାଦ ଡ଼ାକ୍ତରଖାନାରେ ଭର୍ତି କରାଯାଇଥିଲା । ଶିଶୁଟି ସମ୍ପ୍ରତି ସୁସ୍ଥ ରହିଛି । ତେବେ ଶିଶୁ କନ୍ୟାକୁ କିଏ ଓ କାହିଁକି ଏପରି ଅବସ୍ଥାରେ ଛାଡି ଯାଇଛି ସ୍ଥାନୀୟ ପୋଲିସ ସେନେଇ ତଦନ୍ତ ଚଳାଇଛି ।
ଏଠାରେ ଉଲ୍ଲେଖଯୋଗ୍ୟ ଯେ, କନ୍ୟାରତ୍ନର ସୁରକ୍ଷା ପାଇଁ ସରକାରଙ୍କ ବିଭିନ୍ନ ଯୋଜନା ତଥା ବିଭିନ୍ନ ସ୍ୱେଚ୍ଛାସେବୀ ସଂଗଠନ ପକ୍ଷରୁ ବ୍ୟାପକ ଜନସଚେତନତା ସୃଷ୍ଟି କରାଯାଉଥିବା ସତ୍ୱେ ଏଭଳି ଘଟଣା ପ୍ରତ୍ୟେକ ଦିନ ରାଜ୍ୟରେ କେଉଁଠି ନା କେଉଁଠି ଦେଖିବାକୁ ମିଳୁଛି ଯାହାକି ସଭ୍ୟ ସମାଜ ପାଇଁ ଚିନ୍ତାର ବିଷୟ ହୋଇଛି ।
