ବାରିପଦା- ବାରିପଦା ପୌରପରିଷଦ ଉପକଣ୍ଠସ୍ଥ ମଞ୍ଚାବନ୍ଧା (ସ୍ୱରୂପଭିଲ୍ଲା) ସ୍ଥିତ ଜୁହି ଇଣ୍ଟରନେସନାଲ ପ୍ରାଇଭେଟ ଲିମିଟେଡ଼ କାଚ ବୋତଲ ଓ୍ବାସ ଗୋଦାମରେ ଭୟାବହ ଅଗ୍ନିକାଣ୍ଡ । ଦୀର୍ଘ ୯ ଘଣ୍ଟା ଧରି ଅଗ୍ନିଶମ ବିଭାଗର ୨ଟି ଟିମ୍ ଆପ୍ରାଣ ଉଦ୍ୟମ ଚଳାଇବା ପରେ ଲାଗିଥିବା ନିଆଁ ଆୟତାଧୀନ ହୋଇଥିଲା । ଗତକାଲି ରାତି ପ୍ରାୟ ଗୋଟାଏ ସମୟରେ ଅଗ୍ନିକାଣ୍ଡ ଘଟିଥିଲା । ଖବର ପାଇ ବାରିପଦା ଓ ବେତନଟୀରୁ ଅଗ୍ନିଶମ ବିଭାଗର ଦୁଇଟି ଟିମ୍ ଘଟଣାସ୍ଥଳରେ ପହଞ୍ଚି ନିଆଁକୁ ଲିଭାଇବା ପାଇଁ ଉଦ୍ୟମ ଜାରି ରଖିବା ପରେ ମଙ୍ଗଳବାର ପୂର୍ବାହ୍ନ ପ୍ରାୟ ୯ଟା ପରେ ନିଆଁକୁ ଲିଭାଇ ଥିଲେ ।
ଅଗ୍ନିକାଣ୍ଡରେ ଉକ୍ତ ଗୋଦାମ ଭିତରେ ଥିବା ଲକ୍ଷାଧିକ ଟଙ୍କା ମୂଲ୍ୟର ଖାଲି କାଚ ବୋତଲ ଓ ପେଟି ଜଳିପୋଡି ପାଉଁଶ ହୋଇଯାଇଥିଲା । ନିଆଁ ଲାଗିବା ଫଳରେ କାଚ ବୋତଲଗୁଡିକ ଠୋ ଠା ହୋଇ ଫାଟିବାରୁ ଗୋଦାମ ଭିତରକୁ ପଶି ନିଆଁକୁ ଆୟତ୍ତ କରିବା ସମ୍ଭବ ପର ହୋଇନଥିଲା ବୋଲି ଅଗ୍ନିଶମ ବିଭାଗ ଅଧିକାରୀ ପ୍ରକାଶ କୁମାର ଜେନା ସୂଚନା ଦେଇଛନ୍ତି । ଉକ୍ତ ଜୁହି ଇଣ୍ଟରନେସନାଲ ପ୍ରାଇଭେଟ ଲିମିଟେଡ଼” କମ୍ପାନୀର ମାଲିକ ତଥା ଟାଟା ଅଞ୍ଚଳର ଯୋଗେଶ ଗୁପ୍ତା ୨୦୧୩ରୁ ସେହି ଘରକୁ ଭଡ଼ା ସୂତ୍ରରେ ନେଇଥିଲେ ଏବଂ ବଜାରରୁ ଖାଲି ବୋତଲଗୁଡିକୁ ସଂଗ୍ରହ କରିବା ପରେ ତାକୁ ବିଶୋଧନ କରି କାଗଜ ପେଟିରେ ଭର୍ତ୍ତି କରି ବିଭିନ୍ନ କମ୍ପାନୀକୁ ଯୋଗାଇ ଆସୁଥିଲେ । ତେବେ ଗତକାଲି ବିଳମ୍ବିତ ରାତିରେ ହଠାତ୍ ଗୋଦାମରେ ଅଗ୍ନିକାଣ୍ଡ ଘଟିଥିଲା। ନିଆଁ ଲାଗିବାର ପ୍ରକୃତ କାରଣ ଜଣା ପଡିନଥିବା ବେଳେ ବିଦ୍ୟୁତ ସଟସର୍କିଟ ଯୋଗୁଁ ଏହି ଅଗ୍ନିକାଣ୍ଡ ଘଟିଥିବା ଅନୁମାନ କରାଯାଉଛି।
