ଭୁବନେଶ୍ୱର, ଗତ ଚାରିବର୍ଷ ମଧ୍ୟରେ ସାଂସଦ ଭାବରେ ଅପରାଜିତା ଷଡଙ୍ଗୀ ଭୁବନେଶ୍ୱର ଲୋକସଭା ନିର୍ବାଚନମଣ୍ଡଳୀରେ ଲୋକଙ୍କ ସମସ୍ୟା ସମାଧାନରେ ବିଫଳ ହୋଇଥିବା କହିଛନ୍ତି ବିଜେଡି ମୁଖପାତ୍ର ଶ୍ରୀମତୀ ଶ୍ରୀମୟୀ ମିଶ୍ର ।
ମଙ୍ଗଳବାର ଏଠାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଶ୍ରୀମତୀ ମିଶ୍ର କହିଥିଲେ ଯେ ଯେତେବେଳେ ବି ବର୍ଷା ଆସେ, ଭୁବନେଶ୍ୱରର ଇସ୍କନ୍ ମନ୍ଦିର ନିକଟରେ ଥିବା ଜାତୀୟ ରାଜପଥରେ ଜଳବନ୍ଦୀ ଅବସ୍ଥା ସୃଷ୍ଟି ହୁଏ । ଗତ ୪ ବର୍ଷ ଧରିଏହି ଅଂଚଳର ସାଂସଦ ହୋଇଥିଲେ ମଧ୍ୟ ଏହି ସମସ୍ୟା ଦୂର କରିବା ପାଇଁ ସେ କ’ଣ କରିଛନ୍ତି? ଭୁବନେଶ୍ୱରରୁ ଖୋରଧା ପର୍ଯ୍ୟନ୍ତ ଜାତୀୟ ରାଜପଥ କାର୍ଯ୍ୟ ଗତ ଚାରିବର୍ଷ ଧରି ସରୁ ନାହିଁ । ଏମ୍ସକୁ ସଂଯୋଗ କରୁଥିବା ରାସ୍ତା, ପାତ୍ରପଡା, ଯାଆଁଳା ଏବଂ ଭୁବନେଶ୍ୱର-ଖୋରଧା ଜାତୀୟ ରାଜପଥର ଅନେକ ସ୍ଥାନରେ ଓଭିରବ୍ରିଜ ନିର୍ମାଣକାର୍ଯ୍ୟ ଅବ୍ୟବସ୍ଥା ମଧ୍ୟରେ ରହିଛି । ଜାତୀୟ ରାଜପଥ କାର୍ଯ୍ୟ ମନ୍ଥର ଗତିରେ ଚାଲିବାରୁ ଏହି ଦୁଇଟି ସହର ମଧ୍ୟରେ ଯାତ୍ରୀମାନେ ଘଂଟା ଘଂଟା ଧରି ରାସ୍ତାରେ ଅଟକି ରହୁଥିଲେ ମଧ୍ୟ ସାଂସଦ ଭାବରେ ଏହି ସମସ୍ୟାର ସମାଧାନ ପାଇଁ କ’ଣ କରିଛନ୍ତି?
ଏନଏଚଏଆଇ ଦ୍ୱାରାକରାଯିବାକୁ ଥିବା ଭୁବନେଶ୍ୱରର କ୍ୟାପିଟାଲ୍ ରିଜିଅନ୍ ଆଉଟର୍ ରିଙ୍ଗ୍ରୋଡ୍ କେବଳ ଫାଇଲ୍ରେ ସୀମିତ ଅଛି । ଭୁବନେଶ୍ୱର ଲୋକସଭା ନିର୍ବାଚନ ମଣ୍ଡଳୀରେ ଟେଲିକମ୍ ସଂଯୋଗ ବିଶେଷ ଭାବରେ ବେଗୁନିଆ, ବୋଲଗଡ, ବାଲିଅନ୍ତା ଏବଂ ବାଲିପାଟଣା ବ୍ଲକ ସହିତ ବରିମୁଣ୍ଡା, କଳାରାହାଙ୍ଗ, ବାସୁଆଗାଇ, ଇଟିପୁର, ଟିକରାପଡା, ଧଉଳି, ଶିଶୁପାଳ, ଗଡହଳଦିଆ, କେରଙ୍ଗ, ମାଳିପୁର, ଟାଙ୍ଗିଆପଡା, ପୁବସାହି ନାଳିପଡା-ଅର୍ଜୁନପୁର ଭଳି ବହୁ ସ୍ଥାନରେ ଅତ୍ୟନ୍ତ ଦୁର୍ବଳ । ଗତ ଚାରି ବର୍ଷରେ ଏହାର ଉନ୍ନତି ପାଇଁ ସେ କିଛି କରିନାହାନ୍ତି ।
ବ୍ୟାକିଙ୍ଗସେବା ମଧ୍ୟ ଖୋରଧା ଜିଲ୍ଲାର ବିଭିନ୍ନ ପଂଚାୟତ ଯଥା ଚନ୍ଦକା, ଦାରୁଠେଙ୍ଗ, ଅନ୍ଧାରୁଆ, ପାଇକରାପୁର, ମେଣ୍ଢାଶାଳ, ତମାଣ୍ଡୋ, ନାନପୁଟ, କଂଟାବାଡ, ପାଲତୋଟାପଡା, ବାଜପୁର, ନିଜିଗଡତାପଙ୍ଗ, କାନପୁର, ଧଉଳିମୁହଁ, ବ୍ରଜମୋହନପୁର, ନାରଣଗଡ, ଗୋଡିପଡା, ଜଙ୍କିଆ, ଗୋଳବାଇଶାସନ, ଓରାବରସିଂହ, କୁରାଢ଼ମଲ, ବଙ୍ଗିଦା ଏବଂ କାଇପଦର ପଞ୍ଚାୟତ ଏବଂ ଟାଙ୍ଗି ବ୍ଲକରେ ମଧ୍ୟ ଅତ୍ୟନ୍ତ ଦୁର୍ବଳ ।
ଶ୍ରୀମନ୍ଦିରଐତିହ୍ୟ କରିଡର କାମ ବନ୍ଦ ହେବା ପାଇଁ ଶ୍ରୀମତୀ ଅପରାଜିତା ଷଡଙ୍ଗୀ କିଛି ଲୋକଙ୍କ ସହ ଷଡଯନ୍ତ୍ର ରଚି ସୁପ୍ରିମକୋର୍ଟରେ ଏକ ଜନସ୍ୱାର୍ଥ ମାମଲା ଦାଖଲ କରିଥିଲୋ । ଜଗନ୍ନାଥ ଏବଂ ଶ୍ରୀମନ୍ଦିର କାର୍ଯ୍ୟ ବନ୍ଦ କରିବାକୁ ଷଡଯନ୍ତ୍ର କରିଥିଲେ ମଧ୍ୟ ଏଥିପାଇଁ ସେ ଓଡିଶାବାସୀଙ୍କୁ କ୍ଷମା ମାଗିବା ପାଇଁ ତାଙ୍କର ସାମାନ୍ୟତମ ସୌଜନ୍ୟତା ଦେଖାଇ ନାହାନ୍ତି ।
ଅନୁରୂପ ଭାବରେ ଷଡଯନ୍ତ୍ର କରି ଏକାମ୍ର କ୍ଷେତ୍ରଐତିହ୍ୟ ବିକାଶ ପ୍ରକଳ୍ପ କାର୍ଯ୍ୟକୁ ରୋକିବା ପାଇଁ ନିଜ ସ୍ତରରେ ଯଥାସମ୍ଭବ ଚେଷ୍ଟା କରୁଛନ୍ତି । ସେ ମଧ୍ୟ ଲିଙ୍ଗରାଜ ମନ୍ଦିର ଅଧ୍ୟାଦେଶକୁ ଦିଲ୍ଲୀରେ ମଞ୍ଜୁର ନକରିବାକୁ ଷଡଯନ୍ତ୍ର କରିଛନ୍ତି ଏବଂ ଏହି ଲିଙ୍ଗରାଜ ମନ୍ଦିର ଅଧ୍ୟାଦେଶ ଯାହା ଲିଙ୍ଗରାଜ ମନ୍ଦିରର ସେବାୟତମାନଙ୍କୁ ସେମାନଙ୍କ ରୀତିନୀତି ଏବଂ ଜୀବିକା ନିର୍ବାହ ପାଇଁ ସଶକ୍ତିକରଣ କରିବ ତାହା ଦିଲ୍ଲୀରେ ଅପରାଜିତା ଷଡଙ୍ଗୀଙ୍କ ପାଇଁ ଆଗକୁ ବଢିପାରୁ ନାହିଁ । ସେ କେବଳ ନିଜର ପ୍ରଶଂସା ଚାହାଁନ୍ତି, ତେଣୁ ଏକାମ୍ର କ୍ଷେତ୍ରର ଏବଂ ଲିଙ୍ଗରାଜ ମନ୍ଦିର କାର୍ଯ୍ୟକୁ ବନ୍ଦ କରିବା ପାଇଁ ସେ ବହୁତ ତଳକୁ ଖସି ଯାଇଛନ୍ତି, ଠିକ୍ ଯେପରି ସେ ଶ୍ରୀମନ୍ଦିର ଐତିହ୍ୟ କରିଡର କାମ ବନ୍ଦ କରିବାକୁ ଚେଷ୍ଟା କରିଥିଲେ ଏବଂ ବିଫଳ ହୋଇଥିଲେ ।
ଗତ ଚାରିବର୍ଷ ମଧ୍ୟରେ ସେ ଭୁବନେଶ୍ୱର ଲୋକସଭା ନିର୍ବାଚନ ମଣ୍ଡଳୀର ଲୋକଙ୍କ ସମସ୍ୟା ହ୍ରାସ କିମ୍ବା ଦୂର ପାଇଁ ସେ କ’ଣ କରିଛନ୍ତି ? ଗତ ଚାରିବର୍ଷ ଧରି ଲୋକଙ୍କ ପାଇଁ କାମ କରିବା ବଦଳରେ ଶ୍ରୀମତୀ ଷଡଙ୍ଗୀ କେବଳ ଆତ୍ମ-ପ୍ରଚାରରେ ସମୟ କାଟିଛନ୍ତି । ସେ ଗତ ଚାରିବର୍ଷ ଧରି ଭୁବନେଶ୍ୱର ଲୋକସଭା ନିର୍ବାଚନ ମଣ୍ଡଳୀରେ କାମ କରିବା ଅପେକ୍ଷା ତାଙ୍କ ଲୋକପ୍ରିୟତା ବଢ଼ାଇବା ପାଇଁ ଗଣମାଧ୍ୟମ ପାଇଁ ଆବଶ୍ୟକ ଛବି ସୃଷ୍ଟି କରିଛନ୍ତି ଏବଂ ଏଥିପାଇଁ ଠିକ୍ ସମୟରେ ଲୋକମାନେ ତାଙ୍କୁ ଏହାର ଉପଯୁକ୍ତ ଉତ୍ତର ଦେବେ ବୋଲି ଶ୍ରୀମତୀ ମିଶ୍ର କହିଛନ୍ତି । ଏହି ସାମ୍ବାଦିକ ସମ୍ମିଳନୀରେ ବିଜେଡି ପ୍ରବକ୍ତା ମଧୁସ୍ମିତା ନାୟକ ଉପସ୍ଥିତ ଥିଲେ ।
