ଧର୍ମଶାଳା – ପୁଣି ଚଣ୍ଡିଖୋଲ- ଡୁବୁରୀ ୫୩ ନଂ ଜାତୀୟ ରାଜପଥରେ ଦୁର୍ଘଟଣା । ଡେଥ୍ ଜୋନ ପାଲଟି ଗଲାଣି ଏହି ଜାତୀୟ ରାଜପଥ । ସବୁ ଦିନ କିଛି କିଛି ଛୋଟ ବଡ ଦୁର୍ଘଟଣାମାନ ଘଟୁଛି । ଆଜି ଏହି ରାସ୍ତାରେ ୨ ଜଣଙ୍କ ଜୀବନ ଯାଇଛି । ତେବେ ଆଜିର ଦୁର୍ଘଟଣା ଏକ ହୃଦୟ ବିଦାରକ ଘଟଣା । ମୃତୁ୍ୟ ଏମିତି ବି ଆସେ । ରାଜପଥ ଧର୍ମଶାଳା ତହସିଲ ଅନ୍ତର୍ଗତ ବାଘୁଆ ଛକ ନିକଟରେ ଜଣେ ବାଇକ ଆରୋହୀଙ୍କୁ ଏକ ଟ୍ରକ ଧକ୍କା ଦେଇଥିଲା । ଫଳରେ ସେ ଗରୁତର ଆହତ ହୋଇ ଏହି ରାସ୍ତା ଉପରେ ପଡି ରହିଥିଲେ । ଏହା ଦେଖି ତାଙ୍କ ପଛେପଛେ ବାଇକରେ ଆସୁଥିବା ସ୍ଥାନୀୟ କବାଟବନ୍ଧ ଗ୍ରାମର ଅଜୟ କୁମାର ବେହେରା ଆହତ ଯୁବକଙ୍କୁ ସାହାଯ୍ୟ କରିବାକୁ ସେଠାରେ ଅଟକି ଗଲେ । ସଂଗେସଂଗେ ନିଜ ମୋବାଇଲରେ ୧୦୮ ଆମ୍ବୁଲାନ୍ସକୁ ଯୋଗାଯୋଗ କରିଥିଲେ । ହେଲେ ଈଶ୍ୱରଙ୍କର କିନ୍ତୁ ଅନ୍ୟ କିଛି ବରାଦ ଥିଲା । ସେ ଫୋନରେ କଥା ହେଉଥିବା ବେଳେ ତାଙ୍କୁ ଏକ ଟ୍ରକ ଧକ୍କା ଦେଇ ଚାଲିଯାଇଥିଲା । ଏହି ଘଟଣାରେ ଘଟଣାସ୍ଥଳରେ ଅଜୟଙ୍କର ମୃତୁ୍ୟ ହୋଇଯାଇଥିଲା । ଏପଟେ ଗୁରୁତର ଆହତ ହୋଇଥିବା ସୁକିନ୍ଦା ଅଂଚଳର ଚନ୍ଦ୍ର ଶେଖର ଦ୍ୱିବେଦୀଙ୍କୁ ଟାଟା ମେମୋରିଆଲ ହସ୍ପିଟାଲରେ ଭର୍ତି କରାଯାଇଥିଲା । ସେଠାରେ ତାଙ୍କର ମଧ୍ୟ ମୃତୁ୍ୟ ଘଟିଥିଲା । ଦୁର୍ଘଟଣା ପରେ କିଛି ସମୟ ପାଇଁ ଘଟଣାସ୍ଥଳରେ ଉତେଜନା ପ୍ରକାଶ ପାଇଥିଲା । ଖବର ପାଇ ଜେନାପୁର ପୁଲିସ ପଂହଚି ପରିସ୍ଥିତିକୁ ନିୟନ୍ତ୍ରଣ କରିଥିଲା । ତେବେ ଏହି ଜାତୀୟ ରାଜପଥରେ ବାରମ୍ବାର ଦୁର୍ଘଟଣା ଘଟିବାକୁ ନେଇ ସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଇଛି ।
