ବଲାଙ୍ଗିର, ଓଡିଶା ଅବସରପ୍ରାପ୍ତ ସରକାରୀ କର୍ମଚାରୀ ସଂଘ ବଲାଙ୍ଗିର ଶାଖାର ନୃସିଂହ ମନ୍ଦିର ଠାରେ ଗୋବିନ୍ଦ ମିଶ୍ରଙ୍କ ସଭାପତିତ୍ଵରେ ମାସିକ ବୈଠକ ଗତକାଲି ସନ୍ଧ୍ୟାରେ ଅନୁଷ୍ଠିତ ହୋଇଯାଇଛି । ସଭା ପ୍ରାରମ୍ଭରେ ସ୍ଵର୍ଗତ ମହେଶ୍ଵର ଶତପଥିଙ୍କ ଆତ୍ମାର ସଦ୍ଗତି ନିମନ୍ତେ ୨ ମିନିଟ ନୀରବ ପ୍ରାର୍ଥନା କରାଯାଇଥିଲା । ତା’ପରେ ସାଧାରଣ ସଂପାଦକ ମଲିଆ ଗଡୁଆ ପୂର୍ବ ବୈଠକର ବିବରଣୀ ପାଠ କରିବା ସଙ୍ଗେ ସଙ୍ଗେ ଆୟବ୍ୟୟ ଉପସ୍ଥାପନ କରିଥିଲେ । ସଭାରେ ବୈକୁଣ୍ଠ ସ୍ଵାଇଁ ଏବଂ ମଳୟ କୁମାର ଦିଶ୍ରୀ ନୂତନ ଭାବେ ଆଜୀବନ ସଦସ୍ୟତା ଗ୍ରହଣ କରିଥିଲେ ଏବଂ ସଭାରେ ତାଙ୍କୁ ସ୍ଵାଗତ କରାଯାଇଥିଲା । ବରିଷ୍ଠ ସଭ୍ୟ ମନୋରଂଜନ ମିଶ୍ର ଗୃପ ହେଲ୍ଥ ଇନ୍ସୁରେନ୍ସ ଉପସ୍ଥାପନା କରି ଏହା ଉପରେ ଆଲୋଚନା କରାଯାଇ ସଂପାଦକଙ୍କୁ ଏହି ବିଷୟରେ ବୁଝିବା ପାଇଁ ନିର୍ଦ୍ଦେଶ ଏବଂ ଦାୟିତ୍ଵ ଦିଆଯାଇଥିଲା । ଅନ୍ୟତମ ବରିଷ୍ଠ ସଭ୍ୟ ପ୍ରାଣ ବଲ୍ଲଭ ତ୍ରିପାଠୀ ଅବସରପ୍ରାପ୍ତ କର୍ମଚାରୀଙ୍କୁ ସଂଘରେ ସାମିଲ କରାଇବା ପାଇଁ ପ୍ରତିଶୃତି ଦେଇଥିଲେ । ଏତଦ୍ ବ୍ୟତୀତ ମେଡିକାଲ ଏଲାଉନ୍ସ ସମ୍ବନ୍ଧରେ ସରକାରଙ୍କୁ ରିମାଇଣ୍ଡର ପତ୍ର ଦେବା ପାଇଁ ସଂପାଦକଙ୍କୁ କ୍ଷମତା ଏବଂ ନିର୍ଦ୍ଦେଶ ପ୍ରଦାନ କରାଯାଇଥିଲା ।
ବୈଠକରେ ୧୦ ଜଣ କାର୍ଯ୍ୟକାରିଣୀ ସଭ୍ୟଙ୍କ ସମେତ ସର୍ବମୋଟ ୨୨ ଜଣ ଉପସ୍ଥିତ ରହି ସକ୍ରୀୟ ଅଂଶଗ୍ରହଣ କରିଥିଲେ । ଆସନ୍ତା ୦୬/୦୬/୨୦୨୩ ରିଖରେ ସାଧାରଣ ବୈଠକ ଅନୁଷ୍ଠିତ କରିବା ପାଇଁ ଆଜିକାର ସଭାରେ ନିଷ୍ପତ୍ତି ଗ୍ରହଣ କରାଯାଇଥିଲା । ପରିଶେଷରେ ବରିଷ୍ଠ ସଭ୍ୟ ଗୋପବନ୍ଧୁ ପୁରୋହିତ ଧନ୍ୟବାଦ ଅର୍ପଣ କରିଥିଲେ ।
