ଗଞ୍ଜାମ, ବ୍ରହ୍ମପୁରର ପ୍ରସିଦ୍ଧ ମା ବୁଢ଼ୀ ଠାକୁରାଣୀଙ୍କ ଯାତ୍ରା ପଟୁଆରରେ କିଛି ବିବାଦୀୟ ଅଭିନେତ୍ରୀଙ୍କ ଅଶ୍ଳିଳ ଫଟୋ ଧରି ନୃତ୍ୟ କରିବା ଘଟଣାରେ ବଡବଜାର ଥାନା ପୋଲିସ ୫ ଜଣ ଯୁବକଙ୍କୁ ଗିରଫ କରିଛି । ଗିରଫ ୫ ଅଭିଯୁକ୍ତ ହେଲେ ଶିବ ମହାରଣା, ଅନୁପମ ରାଉତ, ଶଙ୍କର ଜେନା, ବାବୁ ନାୟକ ଓ ଭଗବାନ ନାୟକ ।
ମାଙ୍କ ଯାତ୍ରା ପଟୁଆରରେ କିଛି ବ୍ୟକ୍ତି ଗଞ୍ଜାମ ଜିଲ୍ଲାର ପାରମ୍ପରିକ ଦଣ୍ଡନାଚ ପଟୁଆର ବାହାର କରି ଦଣ୍ଡକାଳୀଙ୍କ ସ୍ଥାନରେ କେତେକ ବିବାଦୀୟ ଅଭିନେତ୍ରୀଙ୍କ ଅଶ୍ଳିଳ ଫଟୋ ରଖି ନୃତ୍ୟ କରିଥିଲେ । ଏହି ଘଟଣାକୁ ବିଭିନ୍ନ ମହଲରେ ନିନ୍ଦା କରାଯାଇଥିଲା । କଳା ଓ ସଂସ୍କୃତିର ସହର ବ୍ରହ୍ମପୁରର ପ୍ରସିଦ୍ଧ ମା ବୁଢ଼ୀ ଠାକୁରାଣୀଙ୍କ ଯାତ୍ରାରେ ଏଭଳି ଅଶ୍ଳିଳ ନୃତ୍ୟକୁ ନେଇ ବୁଦ୍ଧିଜିବୀ ମହଲରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା । ଏଭଳି ଅସଭ୍ୟ ଆଚରଣ କରିଥିବା ବ୍ୟକ୍ତିବିଶେଷଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଗଞ୍ଜାମ ଲୋକକଳା ମଂଚ ପକ୍ଷରୁ ଗତକାଲି ବ୍ରହ୍ମପୁର ଏସପି ଡଃ. ସର୍ବଣା ବିବେକ ଏମ.ଙ୍କୁ ନିବେଦନ କରାଯାଇଥିଲା । ଏଭଳି ନୃତ୍ୟର ଭିଡ଼ିଓ ଭାଇରାଲ୍ ହେବା ପରେ ବଡବଜାର ଥାନା ପୋଲିସ ଘଟଣାର ତଦନ୍ତ ଆରମ୍ଭ କରିଥିଲା । ଏ ସଂକ୍ରାନ୍ତରେ ଥାନାରେ ୧୩୫/୨୩ ରେ ଏକ ମାମଲା ରୁଜ୍ଜୁ କରି ପୋଲିସ ସମ୍ପୃକ୍ତ ୫ ଜଣ ଯୁବକଙ୍କୁ ଗିରଫ କରିଛି ।
