ଭୁବନେଶ୍ୱର, ଓଡିଶା ପର୍ଯ୍ୟଟନ ଉନ୍ନୟନ ନିଗମ ଏବଂ ପ୍ରଜାପିତା ବ୍ରହ୍ମାକୁମାରୀ ଈଶ୍ୱରୀୟ ବିଶ୍ୱବିଦ୍ୟାଳୟର ମିଳିତ ଆନୁକୂଲ୍ୟରେ ସୁଶାସନ ନିମନ୍ତେ ମୂଲ୍ୟବୋଧ ଓ ଆଧ୍ୟାତ୍ମିକତା ସଂପର୍କିତ ଆଲୋଚନା ଚକ୍ର ଓଟିଡିସି ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଛି ।
ଏହି ଅବସରରେ ଓଟିଡିସି ଅଧ୍ୟକ୍ଷ ଡଃ ଲେନିନ ମହାନ୍ତି କହିଲେ ଯେ ପ୍ରତ୍ୟେକ ବ୍ୟକ୍ତି ନିଜର ଆଧ୍ୟାତ୍ମିକତା ଚେତନାକୁ ବ୍ୟାପକ କରିବା ହେଉଛି ଆଜିର ସମୟର ଆହ୍ୱାନ । ଗ୍ରାହକମାନଙ୍କୁ ଉନ୍ନତ ସେବା ଯୋଗାଇ ଦେବାରେ ଈଶ୍ୱରୀୟ ବିଶ୍ୱବିଦ୍ୟାଳୟର ଭଗିନୀମାନଙ୍କ ଦ୍ୱାରା ପ୍ରଦତ ମାର୍ଗଦର୍ଶନ ସହାୟକ ହେବା ନେଇ ସେ ଆସ୍ଥାପ୍ରକଟ କରିଥିଲେ । ଏହି ଅବସରରେ ବ୍ରହ୍ମାକୁମାରୀ ଭଗିନୀମାନଙ୍କୁ ଧନ୍ୟବାଦ ଦେଇ ଡଃ ମହାନ୍ତ କହିଲେ ଯେ ଆଜିର ଆଲୋଚନା ଚକ୍ର ସକରାତ୍ମକ ପ୍ରଭାବ ପକାଇବାରେ ସହାୟକ ହେବ ।
ଉକ୍ତ ଆଲୋଚନା ଚକ୍ରରେ ଅନ୍ୟମାନଙ୍କ ମଧ୍ୟରେ ଓଟିଡିସିର ଡିଭିଜନ ମ୍ୟାନେଜର ଅଂଶୁମାନ ରଥ, ଅଭିଜିତ ସ୍ୱାଇଁ, ଆନନ୍ଦ ମହାପାତ୍ର, ପ୍ରଶାନ୍ତ ପଣ୍ଡା ପ୍ରମୁଖ ଉପସ୍ଥିତ ଥିଲେ । ଏହି ଅବସରରେ ବ୍ରହ୍ମକୁମାରୀ ଭଗିନୀମାନଙ୍କୁ ସମ୍ବର୍ଦ୍ଧିତ କରାଯାଇଥିଲା ।
