ବାରିପଦା- ନାବାଳିକାଙ୍କୁ ପ୍ରେମ ନିବେଦନ କରି ବିଫଳ ହେବା ପରେ ତାଙ୍କୁ ଅପହରଣ ଓ ଦୁଷ୍କର୍ମ କରିଛି ଅଭିଯୁକ୍ତ । ଶେଷରେ ଗର୍ଭପାତ କରାଇ ଧରାପଡ଼ିବା ସହ ପୋଲିସ ହାତରେ ଗିରଫ ହୋଇଛି ଅଭିଯୁକ୍ତ । ଏଭଳି ଏକ ସମ୍ବେଦନଶୀଳ ଘଟଣା ଘଟିଛି ମୟୁରଭଞ୍ଜ ଜିଲ୍ଲା ରାଇରଙ୍ଗପୁର ଗ୍ରାମାଞ୍ଚଳ ଥାନା ଅଞ୍ଚଳରେ ।
ସୂଚନା ଅନୁଯାୟୀ, ରାଇରଙ୍ଗପୁର ଗ୍ରାମାଞ୍ଚଳ ଥାନା ଅନ୍ତର୍ଗତ ବଣକାଟି ପଞ୍ଚାୟତର କରକଚିଆ ଗାଁର ସୁନ୍ଦର ମୋହନ ଟୁଡୁ ଜନୈକା ନାବାଳିକାକୁ ଅପହରଣ କରି ୨୦୧୭ ମସିହାରୁ ଅନୈତିକ ସମ୍ପର୍କ ରଖିବା ସହ ତାକୁ ଏକ ଅଜ୍ଞାତ ସ୍ଥାନରେ ରଖିଥିଲା। ଫଳରେ ନାବାଳିକା ଜଣକ ଗର୍ଭବତୀ ମଧ୍ୟ ହୋଇଥିଲେ। ପରେ ଅଭିଯୁକ୍ତ ତାଙ୍କର ଗର୍ଭପାତ କରାଇବା ସହ ଭୟ ଦେଖାଇ ଧମକଚମକ ଦେଇ ବଳପୂର୍ବକ ଦୁଷ୍କର୍ମ କରିଥିବା ନେଇ ସଙ୍ଗୀନ ଅଭିଯୋଗ ହୋଇଛି। ଦୁଷ୍କର୍ମର ଶିକାର ହୋଇ ଆସୁଥିବା ଅପହୃତା ନାବାଳିକା ଗତ ୬ ତାରିଖରେ ଅପହରଣକାରୀ କବଳରୁ କୌଶଳ କ୍ରମେ ଖସି ଆସିବାରେ ସକ୍ଷମ ହୋଇଥିଲେ । ପରେ ରାଇରଙ୍ଗପୁର ଗ୍ରାମାଞ୍ଚଳ ଥାନାରେ ଅଭିଯୁକ୍ତ ବିରୁଦ୍ଧରେ ଲିଖିତ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତିକରି ରାଇରଙ୍ଗପୁର ଗ୍ରାମାଞ୍ଚଳ ଥାନା ପୋଲିସ ଅଭିଯୁକ୍ତ ସୁନ୍ଦର ମୋହନ ଟୁଡୁକୁ ଗିରଫ କରି ପୋକ୍ସୋ ଆଇନ୍ ଅନୁଯାୟୀ ବାରିପଦା ପୋକ୍ସୋ କୋର୍ଟ କୁ ଚାଲାଣ କରିଛି ।
