କେନ୍ଦୁଝର, ବାଇକକୁ ପିଟିଲା କାର୍ । ଫଳରେ ଭାଇଭଉଣୀ ଗୁରୁତର ହୋଇ କଟକ ସ୍ଥାନାନ୍ତରିତ ହୋଇଥିବା ଜଣାପଡିଛି । ସୂଚନାରୁ ଜଣାଯାଏ, ନନ୍ଦିପଦା ଥାନା ଅନ୍ତର୍ଗତ ଏଲ୍ କଣା ଗ୍ରାମର ଜଳଧର ଜେନାଙ୍କ ଝିଅ ମିନତୀ ଜେନା ପୁଅ ରଞ୍ଜନ କୁମାର ଜେନା ଦୁଇ ଜଣ ନିଜ ବାଇକ ଯୋଗେ କୋଣାର୍କରୁ ଘରକୁ ଫେରୁଥିବା ବେଳେ ଆନନ୍ଦପୁର ଥାନା ଚାରି ନାଳିଆ ଛକ ନିକଟରେ ଭଦ୍ରକ ଆଡ଼ୁ ଆସୁଥିବା ଏକ କାର୍ ଖୁବ ଜୋରରେ ସମ୍ମୁଖରୁ ତାଙ୍କ ବାଇକ୍ କୁ ଧକ୍କା ଦେଇଥିଲା । ଫଳରେ ଘଟଣାସ୍ଥଳରେ ମିନତୀ ଓ ତାଙ୍କ ଭାଇ ରଞ୍ଜନ ଗୁରୁତର ଆହତ ହୋଇଥିଲେ । ଆନନ୍ଦପୁର ଥାନା କର୍ମଚାରୀଙ୍କ ସହଯୋଗରେ ଦୁହିଁଙ୍କୁ ଚିକିତ୍ସା ନିମନ୍ତେ ପ୍ରଥମେ ଆନନ୍ଦପୁର ଉପଖଣ୍ଡ ଚିକିତ୍ସାଳୟରେ ଭର୍ତି କରାଯାଇଥିଲା । ସେଠାରେ ଅବସ୍ଥା ଗୁରୁତର ହେବାରୁ ଉଭୟଙ୍କୁ କଟକ ବଡ଼ ଡ଼ାକ୍ତରଖାନାକୁ ସ୍ଥାନାନ୍ତରିତ କରାଯାଇଥିବା ଜଣାପଡିଛି । ଅନ୍ୟପକ୍ଷରେ ଧକ୍କା ଦେଇଥିବା ଗାଡିର ଚାଳକ ଘଟଣାସ୍ଥଳରୁ ଫେରାର୍ ହୋଇଯାଇଛି ।
