ଗଞ୍ଜାମ, ବ୍ରହ୍ମପୁର ସଦର ଥାନା ଅନ୍ତର୍ଗତ ଲୋଚାପଡ଼ା ରାସ୍ତାରେ ଏକ ଘରେ ଏସି ସର୍ଟସର୍କିଟ ଯୋଗୁଁ ଭୟଙ୍କର ଅଗ୍ନିକାଣ୍ଡ ଘଟିଛି । ଏଥିରେ ପୋଡି ହୋଇ ପତ୍ନୀ ପ୍ରାଣ ହରାଇଥିବା ବେଳେ ପତି ଗୁରୁତର ହୋଇଛନ୍ତି । ମୃତକ ଜଣକ ହେଉଛନ୍ତି ପ୍ରଭାକର ସାହୁଙ୍କ ପତ୍ନୀ ଉତରା ସାହୁ । ପ୍ରଭାକର ଶ୍ଵାସରୁଦ୍ଧ ହୋଇପଡିବାରୁ ତାଙ୍କ ସ୍ଵାସ୍ଥ୍ୟାବସ୍ଥା ଗୁରୁତର ହୋଇପଡିଛି । ଖବର ପାଇ ଅଗ୍ନିଶମ ବାହିନୀ ଘଟଣାସ୍ଥଳରେ ପହଂଚି ନିଆଁକୁ ଆୟତ କରିଛି ।
ସୂଚନା ଅନୁଯାୟୀ, ଲୋଚାପଡ଼ା ରୋଡ଼ ବ୍ରଜନଗରରେ ଏକ ଘରର ପ୍ରଥମ ମହଲାରେ ବୃଦ୍ଧ ଦମ୍ପତି ପ୍ରଭାକର ସାହୁ ଓ ଉତରା ସାହୁ ରୁହନ୍ତି । ତାଙ୍କ ପୁଅ ବାହାରେ କାମ କରନ୍ତି । ଗତକାଲି ଅପରାହ୍ନରେ ଘରର ତଳ ମହଲାରେ ପଙ୍ଖା ମରାମତି କରୁଥିବା ଅରୁଣ ବେହେରା ଉପର ମହଲାରୁ ଧୂଆଁ ବାହାରୁଥିବା ଦେଖିବାକୁ ପାଇଥିଲେ । ସେ ତୁରନ୍ତ ଅଗ୍ନିଶମ ବିଭାଗକୁ ଖବର ଦେଇଥିଲେ । ଉପର ମହଲାର ଏକ କୋଠରୀରେ ବୃଦ୍ଧ ଦମ୍ପତି ଶୋଇଥିଲେ । ଅଗ୍ନିଶମ କର୍ମଚାରୀ ସ୍ଥାନୀୟ ଲୋକଙ୍କ ସହାୟତାରେ ଉପର ମହଲାକୁ ଯାଇ କବାଟ ଭାଙ୍ଗି ବୃଦ୍ଧ ଦମ୍ପତିଙ୍କୁ ଉଦ୍ଧାର କରିଥିଲେ । ଅଗ୍ନିକାଣ୍ଡରେ ଉତରାଙ୍କ ଶରୀରର ବିଭିନ୍ନ ଅଂଶ ପୋଡ଼ି ଯାଇଥିବା ବେଳେ ପ୍ରଭାକର ଶ୍ଵାସରୁଦ୍ଧ ହୋଇପଡିଥିଲେ । ଉଭୟଙ୍କୁ ଉଦ୍ଧାର କରାଯାଇ ବ୍ରହ୍ମପୁର ବଡ଼ ମେଡ଼ିକାଲରେ ଭର୍ତି କରାଯାଇଥିଲା । ତେବେ ଗତକାଲି ବିଳମ୍ବିତ ରାତିରେ ଉତରା ଗୁରୁତର ହୋଇପଡିବାରୁ ତାଙ୍କୁ କଟକ ବଡ଼ ମେଡ଼ିକାଲକୁ ନିଆଯାଉଥିବା ବେଳେ ବାଟରେ ତାଙ୍କର ମୃତ୍ୟୁ ଘଟିଛି । ଏସି ସର୍ଟସର୍କିଟ ଯୋଗୁଁ ଅଗ୍ନିକାଣ୍ଡ ଘଟିଥିବା ପ୍ରାଥମିକ ତଦନ୍ତରୁ ଜଣାପଡିଛି ।
