ବଲାଙ୍ଗିର, ବଲାଙ୍ଗିର ଜିଲ୍ଲା ଖପ୍ରାଖୋଲ ଥାନା ତୁର୍ଲା ନିକଟସ୍ଥ ଭୁର୍ଷିବାଞ୍ଜି ଗ୍ରାମରେ ଘଟିଯାଇଛି ଏକ ଅଘଟଣ । ପୂର୍ବ ଶତ୍ରୁତାକୁ କେନ୍ଦ୍ର କରି ଜଣଙ୍କୁ ଟାଙ୍ଗିଆରେ ଆକ୍ରମଣ କରିଛନ୍ତି ଜଣେ ବ୍ୟକ୍ତି । ଆହତ ହୋଇଥିବା ବ୍ୟକ୍ତିଙ୍କୁ ଗୁରୁତର ଅବସ୍ଥାରେ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରାଯାଇଛି ।
ସୂଚନା ଅନୁସାରେ, ରାମେଶ୍ଵର ବରିହା ଏବଂ ଛିନୁ ବରିହା ଭୁର୍ଷିବାଞ୍ଜି ଗାଁରେ ରହନ୍ତି । କୌଣସି କାରଣକୁ ନେଇ ପୂର୍ବରୁ ସେମାନଙ୍କ ମଧ୍ୟରେ ଶତ୍ରୁତା ଲାଗି ରହିଥିଲା । ସୋମବାର ଅପରାହ୍ନରେ ରାମେଶ୍ଵର ନିଜ ଜମିରେ କାମ କରି ଗୋଟିଏ ଗଛ ମୂଳରେ ବିଶ୍ରାମ କରିଥିଲେ । ପୂର୍ବରୁ ଛକି ବସିଥିବା ଛିନୁ ବରିହା ଟାଙ୍ଗିଆରେ ରାମେଶ୍ଵରଙ୍କୁ ଆକ୍ରମଣ କରି ଲହୁଲୁହାଣ କରିଦେଇଥିଲା । ଏସବୁ ସହ୍ୟ କରିନପାରି ରାମେଶ୍ଵର ଚିତ୍କାର କରିଥିଲେ । ରାମେଶ୍ଵରଙ୍କ ଚିତ୍କାର ଶୁଣି ପାଖ ଜମିରେ କାମ କରୁଥିବା ଲୋକମାନେ ରାମେଶ୍ଵରଙ୍କୁ ବଞ୍ଚାଇବା ପାଇଁ ସେଠାକୁ ଧାଇଁ ଆସିଥିଲେ । ଲୋକମାନେ ଆସୁଥିବା ଦେଖି ଅଭିଯୁକ୍ତ ସେଠାରୁ ଦୌଡି ପଳାଇଥିଲା । ଗୁରୁତର ଭାବେ ଆହତ ହୋଇଥିବା ରାମେଶ୍ଵରଙ୍କୁ ଖପ୍ରାଖୋଲ ଡାକ୍ତରଖାନାକୁ ଅଣାଯାଇଥିଲା । ଏନେଇ ରାମେଶ୍ଵରଙ୍କ ପୁଅ ସୁରେନ୍ଦ୍ର ବରିହା ଖପ୍ରାଖୋଲ ଥାନାରେ ଲିଖିତ ଅଭିଯୋଗ କରିଥିଲେ । ଖପ୍ରାଖୋଲ ପୁଲିସ କେସ ନଂ ୪୬/୨୩ରେ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରି ଅଭିଯୁକ୍ତ ଛିନୁ ବରିହାକୁ ଗିରଫ କରିଥିବା ସୂଚନା ମିଳିଛି।
