କୈଳାଶ ଚନ୍ଦ୍ର ପଣ୍ଡାଙ୍କ ରିପୋର୍ଟ,ପୁରୀ,
ବଲିଉଡ ଅଭିନେତ୍ରୀ ଜୟପ୍ରଦା ପୁରୀ ଆସିଛନ୍ତି । ଶ୍ରୀକ୍ଷେତ୍ରରେ ପହଞ୍ଚି ମହାପ୍ରଭୁ ଶ୍ରୀଜଗନ୍ନାଥ ଦର୍ଶନ କରିଛନ୍ତି । ପୁଅ ସମ୍ରାଟ ସହ ପୁରୀରେ ପହଞ୍ଚିବା ପରେ ସେଠାରୁ ସିଂହଦ୍ୱାର ଅଭିମୁଖେ ଯାଇଥିଲେ । ସିଂହଦ୍ୱାରରେ ପହଁଚିବା ପରେ ତାଙ୍କୁ ସେବାୟତ ମଧୁସୂଦନ ସିଂହାରୀ ସ୍ୱାଗତ କରିଥିଲେ ।ପରେ ଜୟାପ୍ରଦା ଶ୍ରୀମନ୍ଦିର ରେ ଜଗା ଦର୍ଶନ ସହ ବେଢ଼ା ପରିକ୍ରମା ଓ ମା ବିମଳା ଓ ଲକ୍ଷ୍ମୀ ମନ୍ଦିର ଦର୍ଶନ କରିଥିଲେ । ମହାପ୍ରଭୁ ଶ୍ରୀଜଗନ୍ନାଥଙ୍କୁ ଦର୍ଶନ କରି ଜୟପ୍ରଦା ଭାବ ବିହ୍ୱଳ ହୋଇ ପଡିଥିଲେ।
ଦୀର୍ଘ ଦଶନ୍ଧି ଧରି ଦର୍ଶକଙ୍କ ହୃଦୟରେ ଅଭିନେତ୍ରୀ ଜୟପ୍ରଦା ରାଜ କରୁଥିଲେ । ଅଭିନୟ ପାଇଁ ସେ ତିନି ଥର ଫିଲ୍ମଫେୟାର ସମ୍ମାନ ପାଇଥିଲେ । ସମୟକ୍ରମେ ଅଭିନେତ୍ରୀରୁ ରାଜନେତ୍ରୀ ଜୟପ୍ରଦା ହୋଇ ଯାଇଥିଲେ। ରାମନବମୀ ଅବସରରେ ଶ୍ରୀମନ୍ଦିରରେ ପ୍ରଭୁ ଜଗନ୍ନାଥ ଦର୍ଶନ କରି ଖୁବ ଆନନ୍ଦ ଅନୁଭବ କରିଥିଲେ, ଜୟପ୍ରଦା ନିଜର ମାନସିକ ରଖିଥିଲେ।
ଏହି ଅବସରରେ ମିଡିଆକୁ ସାକ୍ଷାତ ଦେଇ କହିଥିଲେ, ଜଗନ୍ନାଥ ମନ୍ଦିର ଏମିତି ଏକ ମନ୍ଦିର ଯେଉଁଠି ନିଜକୁ ଭୁଲିଯିବାର ଏକ ଶକ୍ତି ରହିଛି । ଜଗନ୍ନାଥ ଦର୍ଶନ କରି ସେ ନିଜକୁ ଧନ୍ୟ ମନେ କରିଛନ୍ତି । ଏହି ଅବସରରେ ସେ ପୁରୀବାସୀ ତଥା ଓଡ଼ଶାବାସୀଙ୍କର ମଙ୍ଗଳକାମନା କରିଥିଲେ । ଜୟପ୍ରଦାଙ୍କ ଭବିଷ୍ୟତ କାର୍ଯ୍ୟପନ୍ଥ ବିଷୟରେ ପଚାରିବାରୁ ଜଗନ୍ନାଥ ଯାହା ନିର୍ଦ୍ଦେଶ ଦେବେ ସେ ତାହା କରିବେ ବୋଲି କହିଛନ୍ତି । ପୁଅ ସମ୍ରାଟ ସହ ଦର୍ଶନର ଏହି ଅବସର ଖୁବ ସୁନ୍ଦର ଥିଲା ଏବଂ ମହାପ୍ରଭୁ ମନୋବାଞ୍ଛା ପୁରଣ କରିବେ ବୋଲି ସେ କହିଛନ୍ତି ।ଏହାସହିତ ପବିତ୍ର ରାମନବମୀରେ ଓଡିଶା ବାସୀଙ୍କୁ ଜୟପ୍ରଦା ଶୁଭେଛା ଜଣାଇଛନ୍ତି ।
