ନୂଆଦିଲ୍ଲୀ, କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜ୍ଜୁନ ଖଡ଼ଗେ କହିଛନ୍ତି ଯେ, ମୋଦି ସରକାର ଅଦାନି ସମୂହ ଉପରେ ଆସିଥିବା ଅଭିଯୋଗର ତଦନ୍ତ ପାଇଁ ସଂଯୁକ୍ତ ସଂସଦୀୟ କମିଟି (ଜେପିସି) ଗଠନ କରିବାକୁ ଚାହୁଁନାହାଁନ୍ତି । ଏଣୁ ମାମଲାରୁ ନଜର ହଟାଇବା ପାଇଁ କଂଗ୍ରେସ ନେତା ରାହୁଲ ଗାନ୍ଧିଙ୍କ ସହିତ ବିରୋଧୀଙ୍କ ଉପରେ ବିଭିନ୍ନ ଅଭିଯୋଗ ଆଣୁଛନ୍ତି ।
ଶୁକ୍ରବାର ଏନେଇ ଏକ ଟ୍ଵିଟ୍ କରି ଖଡ଼ଗେ କହିଛନ୍ତି ଯେ, ଭାଜପା କହୁଛି ରାହୁଲ ଗାନ୍ଧି ଓବିସି ସମାଜକୁ ଅପମାନିତ କରିଛନ୍ତି । ଏହା ଭିତିହୀନ ଏବଂ ଭୁଲ୍ ଅଟେ । ରାହୁଲ ଗାନ୍ଧି ଏମିତି କିଛି ବି କହି ନାହାଁନ୍ତି । ସେ କହିଛନ୍ତି ଯେ, ପିଏନବି ଓ ଜନତାଙ୍କ ଟଙ୍କା ନେଇ ନିରବ ମୋଦି, ଲଳିତ ମୋଦି, ମେହୁଲ ଚୌକସି ପଳାୟନ କରିଛନ୍ତି । ଓବିସି ବର୍ଗ ତ ପଳାୟନ କରିନାହାଁନ୍ତି, ତେବେ ସେମାନଙ୍କର ଅପମାନ ହେଲା କିପରି ।
