ଗଞ୍ଜାମ, ବ୍ରହ୍ମପୁରର ପ୍ରସିଦ୍ଧ ମା ବୁଢ଼ୀ ଠାକୁରାଣୀଙ୍କ ଦ୍ବିବାର୍ଷିକ ଯାତ୍ରା ପାଇଁ ଆଜି ସ୍ଥାପନ ହେବ ଶୁଭ ଖୁଂଟି । ରାତି ୧୦ଟା ଠାରୁ ୨ଟା ୩୦ ମିନିଟ୍ ମଧ୍ୟରେ ଏହି ଶୁଭଖୁଂଟି ସ୍ଥାପନ ହେବ । ଏନେଇ ପୂର୍ବରୁ ଜ୍ୟୋତିଷ ସମୟ ଧାର୍ଯ୍ୟ କରିଛନ୍ତି । ଏଥିସହ ପରମ୍ପରା ଅନୁଯାୟୀ, ଆଜି ସକାଳେ ଦେଶି ବେହେରା ସାହିରେ ଡ଼େଙ୍ଗୁରା ଦିଆଯାଇଛି ।
ଆଜି ନିର୍ଦ୍ଧାରିତ ସମୟରେ ଠାକୁରାଣୀଙ୍କ ପିତା ଦେଶି ବେହେରା ତଥା ପି. ଦୂର୍ଗାପ୍ରସାଦ ଏକ ବର୍ଣ୍ଣାଢ଼୍ୟ ପଟୁଆରରେ ଠାକୁରାଣୀ ମନ୍ଦିରକୁ ଯାଇ ସେଠାରେ ଶୁଭଖୁଂଟି ପୂଜାର୍ଚ୍ଚନା କରି ପୁଣି ପଟୁଆର ସହ ନିଜ ବାସଭବନ ସମ୍ମୁଖକୁ ଆସିବେ । ସେଠାରେ ଏକ ପିଣ୍ଡିରେ ଏହି ଶୁଭଖୁଂଟି ସ୍ଥାପନ କରାଯିବ । ଏହାପରେ ଠାକୁରାଣୀ କେବେ ବାପଘରକୁ ଆସିବେ ଓ ଯାତ୍ରା ଆରମ୍ଭ ହେବ ଏବଂ କେବେ ମନ୍ଦିରକୁ ପ୍ରସ୍ଥାନ କରିବେ ତା’ର ଶୁଭ ତିଥି ନିର୍ଣ୍ଣୟ କରି ଜଣାଇବେ ଜ୍ୟୋତିଷ । ସେହି ଅନୁସାରେ ଠାକୁରାଣୀ ଯାତ୍ରା ଅନୁଷ୍ଠିତ ହେବ ବୋଲି ଦେଶି ବେହେରା ସୂଚନା ଦେଇଛନ୍ତି ।
