ଭଦ୍ରକ – ଗତ ୨୮ ତାରିଖରେ ଜଳେଶ୍ବର ଥାନା ଅଧୀନସ୍ଥ ୬୦ନଂ ଜାତୀୟ ରାଜପଥ ଏକତାଳି ଠାରେ ବନ୍ଧୁକ ମୁନରେ ଲୁଟ୍ ହୋଇଥିବା ଲକ୍ଷାଧିକ ଟଙ୍କାର ଲୁଟେରାଙ୍କ ମଧ୍ଯରୁ ୫ ଜଣଙ୍କୁ ଭଦ୍ରକରୁ ଗିରଫ କରାଯାଇଛି। ପ୍ରାପ୍ତ ଖବରରୁ ଯାହା ଜଣାଯାଏ କୋଲକାତା ବିଶିପୁରର ୬ ଜଣ ବ୍ୟବସାୟୀ ଏକ ବୋଲେରୋରେ ଚଣ୍ଡିଖୋଲରୁ ଆସୁଥିବା ସମୟରେ ଜଳେଶ୍ବର ଥାନା ଅଧୀନ ୬୦ନଂ ଜାତୀୟ ରାଜପଥର ଏକତାଳି ଠାରେ ୯ ଜଣ ଲୁଟେରା ସେମାନଙ୍କୁ ବନ୍ଧୁକ ଦେଖାଇ ୧୦ ଲକ୍ଷରୁ ଉଦ୍ଧ୍ର୍ବ ଟଙ୍କା ଲୁଟି ନେଇଥିଲେ। ପରେ ବାଲେଶ୍ବର ଜିଲା ପୁଲିସ୍ ପକ୍ଷରୁ ଘଟଣାକୁ ଗୁରୁତର ସହ ବିଚାର ଡିଏସ୍ପି ମନୋଜ ରାଉତଙ୍କୁ ତଦନ୍ତ ଭାର ଦେଇଥିଲେ। ଶ୍ରୀ ରାଉତଙ୍କ ନେତୃତ୍ବରେ ଜଳେଶ୍ବର ଥାନାଧିକାରୀ ପ୍ରଦୀପ ମାଝୀଙ୍କ ସହିତ ଏକ ଟିମ୍ ତଦନ୍ତ କରି ଜଡିତ ୯ ଜଣଙ୍କ ମଧ୍ଯରୁ ୫ ଜଣଙ୍କୁ ଭଦ୍ରକ ପୁଲିସ୍ ସହାୟତାରେ ଗିରଫ କରିଛନ୍ତି। ଏବଂ ସେମାନଙ୍କ ଠାରୁ ୧ ଲକ୍ଷ ୮୩ ହଜାର ୫ ଶହ ଟଙ୍କା ଏକ ଆପାଚି ମୋଟର ସାଇକେଲ୍, ବ୍ୟବହୃତ ଏକ ସ୍କୋର୍ପିଓ ଗାଡି, ମୋବାଇଲ୍ ଫୋନ୍, ସୁନା ଚେନ୍ ଓ ମୁଦି ଜବତ କରିଛନ୍ତି। ସମସ୍ତ ଲୁଟେରା ଭଦ୍ରକ ଅଂଚଳର ବୋଲି ଜଣାପଡିଛି।
