ହରିଚନ୍ଦନପୁର,କେନ୍ଦୁଝର ଜିଲ୍ଲା ହରିଚନ୍ଦନପୁର ଥାନା ଅନ୍ତର୍ଗତ କାଳିମାଟି ଗ୍ରାମ ନିକଟସ୍ଥ ଜଙ୍ଗଲରୁ ବୁଧବାର ସକାଳ ସମୟରେ ଏକ ଝୁଲନ୍ତା ମୃତଦେହ ଉଦ୍ଧାର ହୋଇଛି । ମୃତ ଯୁବକ ଜଣଙ୍କ କାଳିମାଟି ଗାଁର ନିର୍ମଳ କୁମାର ସାହୁ(୩୨) ବୋଲି ଜଣାପଡିଛି । ସୂଚନା ଅନୁଯାୟୀ ଚଳିତ ମାସ ୧୦ ତାରିଖ ନିର୍ମଳ ବିବାହ କରିଥିଲେ, ୧୩ ତାରିଖରେ ତାଙ୍କର ଚତୁର୍ଥୀ ସରିଥିଲା । ଚତୁର୍ଥୀର ପରଦିନ ସକାଳୁ ନିଜ ବଗିଚାକୁ ପିଆଜ ଆଣିବାକୁ ଯାଇ ଆଉ ଘରକୁ ଫେରିନଥିଲେ । ନ ଫେରିବା କାରଣରୁ ପରିବାର ଲୋକେ ବହୁ ଖୋଜା ଖୋଜି କରିବା ପରେ ମଧ୍ୟ ତାଙ୍କର କିଛି ପତା ମିଳିନଥିଲା । ଆଜି ସକାଳେ ଗାଁ ଲୋକେ ମହୁଲ ଗୋଟେଇବା ପାଇଁ ଜଙ୍ଗଲ ଯିବା ସମୟରେ ନିର୍ମଳଙ୍କ ଝୁଲନ୍ତା ମୃତଦେହ ଦେଖିବାକୁ ପାଇଥିଲେ । ନିଜେ ପିନ୍ଧିଥିବା ଲୁଙ୍ଗିକୁ ବେକରେ ବାନ୍ଧି ନିର୍ମଳଙ୍କ ଆତ୍ମହତ୍ୟା କରିଥିବା ଜଣାପଡ଼ିଛି । ଘଟଣା ଦେଖିବା ପରେ ଗ୍ରାମ ଓ ପରିବାର ଲୋକେ ସଙ୍ଗେ ସଙ୍ଗେ ସ୍ଥାନୀୟ ପୋଲିସକୁ ଖବର ଦେଇଥିଲେ । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ନିର୍ମଳଙ୍କ ଶବକୁ ଉଦ୍ଧାର କରି ବ୍ୟବଚ୍ଛେଦ ନିମନ୍ତେ ପଠାଇଥିବା ସହ ଘଟଣାର ସତ୍ୟାସତ୍ୟ ଜାଣିବା ପାଇଁ ତଦନ୍ତ ଜାରି ରଖିଛି ।
