କନ୍ଧମାଳ, କନ୍ଧମାଳ ଜିଲ୍ଲା ଟିକାବାଲି ଥାନାରେ କାର୍ଯ୍ୟରତ ଜଣେ କନେଷ୍ଟବଳ ନିଜ ବେକରେ ରଶି ଲଗାଇ ଆତ୍ମହତ୍ଯା କରିଛନ୍ତି। ମୃତ କନେଷ୍ଟବଳଙ୍କ ନାମ ଶ୍ରୀନିବାସନ ଘଟାଲ ବୋଲି ଜଣାପଡିଛି। ଆଜି ସକାଳେ ପ୍ରାୟ ୧୦ ଟା ବେଳେ ସେ ଜଳଖିଆ କରୁଥିବା କିଛି ଥାନା କର୍ମଚାରୀଙ୍କ ଠାରୁ ଜଣାପଡ଼ିଛି ।
ଶ୍ରୀନିବାସଙ୍କର ଥାନା ଭିତରେ ସେଣ୍ଟ୍ରି ଡିଉଟି ଥିଲା। ସେ ଡିୟୁଟିରେ ଯୋଗ ଦେବାରେ ବିଳମ୍ବ ହେବାରୁ ତାଙ୍କୁ ଡାକିବା ପାଇଁ ଜଣେ ଥାନା କର୍ମଚାରୀ ସେ ରହୁଥିବା ବ୍ଯାରେକକୁ ଯାଇ ଦେଖିବା ବେଳକୁ ବ୍ଯାରେକରେ ଶ୍ରୀନିବାସଙ୍କ ଝୁଲନ୍ତା ମୃତଦେହ ଦେଖି ଥାନା ଅଧିକାରୀଙ୍କୁ ଖବର ଦେଇଥିଲେ। ଥାନା ଅଧିକାରୀ ଘୁ.ଉଦୟଗିରି ଏସଡିପିଓ ତିରୁପତି ରାଓ ପଟ୍ଟନାୟକଙ୍କୁ ଏ ସମ୍ପର୍କରେ ସୂଚନା ଦେବା ପରେ ଏସଡିପିଓ ଘଟଣାସ୍ଥଳରେ ପହଞ୍ଚି ଶବକୁ ଜବତ କରି ବ୍ଯବଛେଦ ନିମନ୍ତେ ପଠାଇବା ପାଇଁ ନିର୍ଦ୍ଦେଶ ଦେବା ସହ ଘଟଣାର ତଦନ୍ତ ଆରମ୍ଭ କରାଇଥିବା ଜଣାପଡିଛି। ତେବେ ଶ୍ରୀନିବାସ କୁଆଡେ କିଛି ଦିନ ହେଲା ମାନସିକ ଚାପଗ୍ରସ୍ତ ଥିବା ନେଇ କିଛି କର୍ମଚାରୀଙ୍କ ଠାରୁ ସୂଚନା ମିଳିଛି। ତେବେ ସେ କେଉଁ ପରିସ୍ଥିତିରେ ଆତ୍ମହତ୍ୟା କରିଛନ୍ତି ତାହା ତଦନ୍ତ ପରେ ଜଣାପଡିବ ବୋଲି ପୋଲିସ ସୂତ୍ରରୁ ଜଣାଯାଇଛି।
