ଦୋଳ ବିମାନକୁ ପିଟିଲା ପିକଅପ୍ ଭ୍ୟାନ୍

• ଦୁଇ ମୃତ, ୩ ଗୁରୁତର

କେନ୍ଦ୍ରାପଡ଼ା,  ଦୋଳ ମେଲଣ ସାରି ଫେରୁଥିବା ବେଳେ ଘଟିଗଲା ଅଘଟଣ । ଦୋଳ ବିମାନକୁ ଧକ୍କା ଦେଲା ମାଛ ବୋଝେଇ ପିକଅପ୍ ଭ୍ୟାନ୍ । ଏଥିରେ ୨ ଜଣଙ୍କର ମୃତ୍ୟୁ ଘଟିଥିବା ବେଳେ ୩ ଜଣ ଗୁରୁତର ହୋଇଛନ୍ତି । ଆହତ ମାନଙ୍କୁ ପ୍ରଥମେ କେନ୍ଦ୍ରାପଡ଼ା ମେଡ଼ିକାଲ ଏବଂ ପରେ ଅଧିକ ଚିକିତ୍ସା ନିମନ୍ତେ କଟକ ବଡ଼ ମେଡିକାଲକୁ ସ୍ଥାନାନ୍ତରିତ କରାଯାଇଛି । ଗତକାଲି ବିଳମ୍ବିତ ରାତିରେ କଟକ – ଚାନ୍ଦବାଲି ରାସ୍ତାର କେନ୍ଦ୍ରାପଡ଼ା ସଦର ଥାନା ଅନ୍ତର୍ଗତ ଦୁହୁରିଆ ନିକଟରେ ଘଟିଛି ଏହି ଦୁର୍ଘଟଣା ।

ଗତକାଲି ୮ ଜଣ ଭାରୁଆ ଦୋଳ ବିମାନକୁ କାନ୍ଧେଇ ବଡ଼ଗାଁରୁ ବାଲିଆ ମେଲଣକୁ ଯାଇଥିଲେ । ସେଠାରୁ ଦୋଳ ବିମାନକୁ କାନ୍ଧେଇ ଫେରୁଥିବା ବେଳେ ଦୁହୁରିଆ ନିକଟରେ କଟକ ଆଡୁ ଆସୁଥିବା ଏହି ମାଛ ବୋଝେଇ ପିକଅପ୍ ଭ୍ୟାନ୍ ଟି ପଛପଟୁ ସେମାନଙ୍କୁ ଧକ୍କା ଦେଇଥିଲା । ଫଳରେ ଘଟଣାସ୍ଥଳରେ ସୋମନାଥ ସାହୁ (୪୭)ଙ୍କ ମୃତ୍ୟୁ ଘଟିଥିଲା । ୪ ଗୁରୁତରଙ୍କୁ କେନ୍ଦ୍ରାପଡ଼ା ମେଡିକାଲରେ ପ୍ରାଥମିକ ଚିକିତ୍ସା ପରେ କଟକ ବଡ ମେଡ଼ିକାଲକୁ ସ୍ଥାନାନ୍ତରିତ କରାଯାଇଥିଲା । ସେଠାରେ ଅନ୍ୟ ଜଣେ ଗୁରୁତର ଦିବ୍ୟାଜ୍ୟାତି ଦାସ (୨୨)ଙ୍କ ମୃତ୍ୟୁ ଘଟିଛି । ୩ ଗୁରୁତର କଟକ ବଡ଼ ମେଡିକାଲରେ ଚିକିତ୍ସାଧିନ ରହିଛନ୍ତି । ସେମାନଙ୍କ ମଧ୍ୟରୁ ଦୁଇ ଜଣଙ୍କ ଅବସ୍ଥା ସଙ୍କଟାପନ୍ନ ରହିଛି । ଦୁର୍ଘଟଣାରେ ଦୋଳ ବିମାନଟି ଭାଙ୍ଗିରୁଜି ଯାଇଛି । ଖବର ପାଇ ସଦର ଥାନା ପୋଲିସ ଘଟଣାସ୍ଥଳରେ ପହଂଚି ତଦନ୍ତ କରିଛି । ଦୁର୍ଘଟଣା ଘଟାଇଥିବା ପିକଅପ୍ ଭ୍ୟାନ୍ କୁ ଜବତ କରିବା ସହିତ ଡ୍ରାଇଭରକୁ ଥାନାରେ ଅଟକ ରଖି ପଚରା ଉଚରା ଚଳାଇଛି । ପୋଲିସ ପକ୍ଷରୁ ଏନେଇ ଅଧିକ ତଦନ୍ତ ଜାରୀ ରହିଛି ।